Shillong, Risaw 23
Ka lympung ialehkai 31st State Karate Championship 2025 ba la pyniaid da ka All Meghalaya Karate-Do Association (AMKA) ka la sdang ha ka sngi Palei ha Indoor Stadium kaba ha JNSC, Polo.
Ïa kane ka lympung ïalehkai ka ban neh haduh lai sngi kynthih, la plie da ka Vice President ka Megha -laya State Olympics Association Kong Matsiewdor War Nongbri ha ryngkat ka jingïadon lang u Joint Secretary ka MSOA Bah Pyn-bianglang Laloo, ki nongïalam ka AMKA bad kiwei-kiwei.
Ki la don kumba 514 ngut ki nongïalehkai karate kiba la wan shim bynta na kylleng ki phra tylli ki district jong ka Jylla bad na ka liang u President Bah Hunlang Lytan u la ong ba ki nongshim bynta ki la kiew na kaba long ha u snem ba la lah kaba long tang 456 ngut. Ïa kane ka lympung la kyrshan lang da ka tnat ïalehkai jong ka Sorkar Jylla.
Kane ka sngi sdang ka dei ruh ka lyngkhuh sngi ïap kaba 14 jong u Bah Stephan Leong, uba long u nongseng ïa ka All Meghalaya Karate Do Association ha kaba la pynlong da ka jingsngap jar kaba shi minit kum ka dak jong ka jingkynmaw burom ïa utei u nongseng.
Na ka liang ka Commissioner and Secretary jong ka Sorkar Jylla Kong Matsiewdor ka la pynpaw ka jingïaroh ïa ki bor pynïaid ka AMKA kiba la lah ban pynlong ïa ki lympung ïalehkai la laiphew snem kynthih.
“Ka Karate ka la buh ïa ki tynrai kiba jylliew ha ka Jylla jong ngi. Bun ki synjuk ïalehkai kin sa pynlong ïa ki lympung ïalehkai, hynrei ka AMKA ka la lah ban leh ïa kaba bha tam na ka bynta ka jingmyntoi ki khynnah mynta la 31 snem kynthih,” ka la bynrap.
Da kaba shim na ka jingshem jong ka, ka Kong Nongbri ka la ai jingmut ruh ïa ki nongïalehkai karate kiba la ïalum lang ha kane ka sngi ba kin pyndonkam hok ïa la ki sap da kaba kin donkam ban bate ïa ka por, ka jingpule jong ki bad kumjuh ruh ki donkam ban ailad ïalade ban shongthait.
Ha kane ka lympung ki la don bun ki nongïalehkai karate kiba ïashim bynta ha ka sien kaba nyngkong eh ha kane ka lympung, katba ki la don ruh kiba la khur takma na ka bynta ka Jylla ba ki lympung kiba la long shabar. Ha kane ka lympung la pynlong ïa ki jingïalehkai kum ka kumite (sparring) bad ka kata (choreographed movement demonstration) ha la ki jong ki kyrdan.
Ïa kane ka lympung yn pynkut ha ka sngi Saitjaiñ ha kaba u Myntri Sorkar u Bah Sanbor Shullai un long u kongsan.
