Shillong, Risaw 23
U Bah Powel Sohkhlet uba dei u Executive Member ba dei peit ïa ka tnad kam pynroi jong ka Khasi Hills Autonomous District Council (KHADC) u la pyni jingdom ïa u Bah Titos Chyne uba dei u Nongïalam Liang Pyrshah namar u kylli shi kylli haba u la dep ban jubab.
Kane ka jingdom u Bah Powel ka dei ha ki kynta kylli jingkylli ha ka Dorbar Synrai kaba ar sngi kaba là long ha ka sngi Palei.
U Bah Powel u la dep jubab ba ka jingslem ban ïoh ïa ka pisa kaba arsien ka dei namar ka shem shitom haba leh ‘online’.
Kane ka jingjubab u Bah Powell ka dei kaba là buh jingkylli ka Kong Grace Kharpuri kaba là buh jingkylli ba lano ka pisa kaba arsien jong ka Tied bad Untied Grant jong u snem 2021-2022.
Haba u Bah Titos u la kylli bynrap biang ïa kajuh ka jingkylli da kaba ong ba ka pisa kaba nyngkong ka la long kaba ïaid beit khlem don jingeh hynrei balei pat ka mih jingeh ban pyllait kaba ar sien, hynrei mynta la ïaid haduh phra bnai ka jingkhmih lynti kan ym poi sha ka thong namar ka ’15th Finance Commission’ ka la kut haba ka la sdang sa ka ’16th Finance Commission’.
Kumta u Bah Powel u la ïeng ban pyni jingdom ïa u Bah Titos da kaba ong “lada phi kren, sngewbha phai shadien namar ka ’15th Finance commission’ ka sdang ha u snem 2021-22 hynrei ka VPP ka dang shu wan mynta u snem 2025.”
U la ong ba ka kyndon ka batai ban siew ‘online’ hynrei ha ka EC barim ki phah siew da ka ‘cheque’ kane ka la buh jingeh mynta ban pynbiang ïa ki kot ki sla ban siew ‘online’ ïa ka pisa kaba ar sien.
Haba jubab ïa ka jingkylli ka Kong Grace Mary Kharpuri, u Bah Powel u la ong ba ka EC ka khlem shong thiah thai, hynrei ki la trei ïa ka kam namar ki don shibun ki kyndon ba hap ban pyndap da ka ‘online’ hashuwa ba ka Sorkar Jylla kan pyllait ïa ka pisa kaba ar sien.
