Nongstoiñ, Risaw 23
Hapdeng ka jinghiran ha ka kamai ka kajih, hynrei ka jingdon ka mynsiem kaba kylluid bad ka jingïatylli ka la pynlong ïa ka kynhun ki nongñiah taksi jong ka thaiñ Mawkadiang, West Khasi Hills ïa kaba la tip kum ka “Mawkadiang Civil Local Taxi & Driver Association” ba kin lah ban pyndep ïa ka jingthrang ka jong ki ban leh ïa ki kam ai sngewbha, kumjuh ruh ban pynkhuid ïa ka shnong ka thaw bad ban maramot ïa ka surok shnong .
Ïa kane la sakhi ha ka Sngi palei jong ka taïew, ha kaba ki nongñiah taksi kiba shait im sngi ban bylla ha ka kam ñiah kali bad kiba hap ruh hapoh ka Mawkadiang Civil Local Taxi & Driver Association ha ryngkat ki nongshong shnong ka shnong Mawkadiang , ki khynnah skul ki la ïa mih paidbah ban pynkhuid ïa ki rud ki kiar jong ka shnong ka thaw.
Ha kane ka sngi, hashuwa ban pynkhuid ïa ka shnong, ki surok bad ban leit ai sngewbha, na ka liang ka seng ka la sdang ruh da ka jingïalang kaba lyngkot ïa kaba la pynlong ha jaka ïeng kali ha shnong Mawkadiang ha kaba u Sordar jong ka shnong Mawkadiang, u Bah Paising Puwein u la don lang ha ryngkat ka jingdonlang ruh u Secretary ka shnong, u President ka seng, Bah Agoningstar Kharbani, u Secretary, Bah Rollingstar Marweiñ, u Adviser, Bah Olandar Diengdoh bad kiwei.
Ha kane ka sngi, nalor ka jingpynkhuid ïa ka shnong, ki dkhot jong ka Association ki la pynlong ruh ïa ka jingmaramot ïa ka surok shnong kaba na Civil Hospital, Nongstoiñ sha Pdeng Shnong Mawkadiang.
Nangta, ki nongïalam ha ryngkat ki dkhot ka seng ki la leit ban ai sngewbha kum ki shuki, ki ‘Universal Globe’ sha ki skul ba kynthup ïa ka BPL Secondary School Mawkadiang bad ka RC LP School.
Shuh shuh ki la ïoh ruh ban leit ai sngewbha da u khaw bad kiwei-kiwei ki marbam sha kawei ka longïing hapoh ka shnong kaba mad ïa ka jingeh na ka jingthiah pang mynta la bun snem, ha kajuh ka por, ka seng ka la ïoh ruh ban buh ïa ki jaka buh ñiut ha ki dong bapher-bapher jong ka shnong .
U Sordar ka shnong Mawkadiang, u Bah Paising Puwein haba kren ha kane ka jingïalang u la pynpaw ïa ka jingsngewtynnad ban ïohi ïa ka seng ba ka don ka mynsiem ban shimkhia ha kaba u la pynpaw da kaba ong ba “ngim pat ju ïohi kum ïa kane ka jingshimkhia, nga sngew ban kitbok kitrwiang ïa ki nongkitkam jong ka seng kiba la poi pyrkhat ban wanrah ïa kane ka bynta.”
Shuh shuh u kyntu ïa ki nongshong shnong naduh kiba dang rit haduh kiba la heh ba kin burom ïa kaei ba ka seng ka buh bad pynbeit ïa ki ‘Dustbin’ ha ki dong bapher-bapher jong ka shnong bad u la pynpaw ïa ka jingkyrmen ba lyngba kane yn ïohi ïa ka jingkhuid jingsuba hapoh ka shnong ka thaw.
Haba kren ha kaba ïadei, bad ka jingleit ai sngewbha jong ka Association sha ki skul bad ki longing na kaliang jong u Sordar u la ong, “kum u nongïalam Shnong nga ai ka jingïaroh ïa ka Association ba nangne sha khmat phin nang ïoh shuh-shuh ban leh ïa ki kam ki ba bha”. Da kaba u la bynrap bad kyntu ïa ki para nongñiah kali ba kin long shitylli ban lah ban rat dyngkhong ïa kino-kino ki jingsniew
