Shillong, Risaw 23
Ka Centre for Historical Research Synod College (CHRSC) ha ka 23 tarik u Risaw 2025, ka la pynlong ïa ka National Seminar halor ka phang Shadows of 1975: The Emergency and Meghalaya’s Journey as a Young State, ka ban long 2 sngi kata naduh ka 23 tarik haduh ka 24 tarik u Risaw 2025.
Ka jingïalang ka long kum ka jingïakynduh jong ki stad saiñ pyrthei, ki nongthoh kot, ki Myntri, ki nonghikai bad ki samla pule ban pyrkhat bniah halor ka snem 1975 ka por jong ka Emergency ha ri India bad ka jingïadei jong ka bad ka Jylla Meghalaya kaba dang shu ïoh Jylla thymmai ha kato ka por.
La plie paidbah ïa katei ka jingïalang da u Bah Sanbor Shullai, u Myntri Sorkar u ba long ruh kum u kongsan.
Haba ai jingkren ha kane ka sngi, u Bah Sanbor kum u wei na ki samla pule kane ka kolej ha ki por ba mynshwa u la kyntu ïa ki samla pule ba kin trei shitom ban ïakhun ïa ka exam IAS namar na ki 3 tylli ki jaidbynriew heh paid ha ka Jylla haduh mynta ym don shuh kiba pass ïa ka exam IAS hadien ka Kong Isawanda Laloo.
Ha kane ka sngi la pynlong ruh ïa ka debate competition na ka bynta ki samla pule, ka jingpyni ïa ka phlim halor ka Emergency da ka Ministry of Information and Broadcasting bad ka jingpyni ïa ki dur ki dar (Photo Gallery) halor ka Emergency jong u snem 1975, ba la pynbit pynbiang da ka CHRSC.
