Nongpoh, Risaw 23
Ka Adventurous Hynñiewtrep Off Roaders (AHOR), kawei na ki kynhun kaba paw ha ka Jylla ban kyntiew ïa ka rukom ñiah kali ha ki surok khohruh khohram, ha ka sngi Palei ka la sdang ïa ka 7th AHOR 4×4 off Road Challenge 2025 ha ka shnong Mawlyndep, Ri Bhoi District.
Ha kane ka kynti, ki don haduh kumba 60 ngut ki nongwan shim bynta na kylleng ka Jylla bad kynthup ruh na kiwei de ki Jylla jong ka ri, ki ban ïakhun ha ki lai tylli ki kyrdan ba kynthup ïa ka stock, semi-modified and pro-modified. Kumba long ha ki snem ba lah dep, mynta ka kynti ruh, ki don ruh ki nongñiah kali kynthei kiba la wan ban ïashim bynta ha kane ka lympung kaban neh lai sngi lynter, kata naduh mynta ka sngi bad kan kut ha ka 25 tarik mynta u bnai.
Kumba mynta u snem, ka dei ruh artad ka jingdap shiphew snem ka jingïaid lynti naduh ba la seng ha u snem 2015, ki nongïalam ka AHOR ki la pynpaw ïa ka jingkmen shikatdei ba mynta u snem kane ka lympung ka la ïoh ban rung ha ka Meghalaya Autumn Calendar bad ïoh ruh ïa ka jingkyrshan jong ka Sorkar kumba long lem kiwei ki tamasa ba heh ha ka Jylla, kum ka Cherry Blossom Festival, ka Winter Takes, ka Me·Gong Festival bad kiwei-kiwei.
Ïa kane ka jingïakop ñiah kali la wan ban plie paidbah da u Bah Damian Umdor, President ka AHOR ha ka jingdon ryngkat jong u Bah Ferdynald Khar-kamni Vice President, u Bah Ferdinand Jahrin General Secretary, u Bah Robin Markhap nongkitkam ka AHOR nalor kiwei-kiwei de ki nongkitkam ka seng.
