Shillong, Risaw 23
Ha ka 23 Tarik u Risaw 2025, kawei ka durkhih ka la saphriang ha ki rynsan social media, ha kaba ki ar kynhun ki la ïa shoh ïa dat hapdeng surok ha Khyndailad.
Katkum ka durkhih ba la saphriang, la ïohi ba ki ar kynhun ki la ïa shoh tyngeh bad la ïohi ruh ba ki arngut ki la shah kyrdem jem bad ki la thiah lyngktar hapdeng surok.
La ïoh jingtip ba kane ka durkhih ka la saphriang ha ka sngi Palei jong ka taïew, hynrei ym shym tip pat, ba ka dei halor kaei ka daw ba kitei ki ar kynhun ki ïashoh hapdeng surok ha Khyndailad.
Haba pyrshang bad wad jingtip kham bniah na ki paidbah kiba die dukan marjan bad katei ka jingjia, hynrei ki la pyntip ba kim shym la tip ei-ei halor kane ka jingjia ïashoh kitei ki ar kynhun.
La ïohi ruh lyngba ka durkhih, ba na ka liang ki longkmie kiba don lang ha katei ka jaka ki la pynjai jai ïa kitei ki samla shynrang ba ïashoh, hynrei kim shym la sngap satia bad ki ïa pyni bor u wei hapdeng u wei pat haduh ba ki arngut ki la shah kyrdem bad thiah lyngktar ha surok.
