Shillong, Risaw 23
Ka lympung ïalehkai ba thymmai ïa kaba la tip kum ka SSA Champions Cup kan sdang naduh u bnai ban wan ha SSA Stadium, Polo bad kane ka lympung lehse kan pynhun ïa ki paidbah riew ïeit phutbol ka nongbah ba kin wan ban sakhi ïa kitei ki jingïalehkai kiba kham pher bad itynnad.
Lyngba ka jingshim khia da ka Shillong Sports Association, kane ka lympung kan pynïasoh lang ïa ki kynhun nongjop jong baroh ki kyrdan ïalehkai. Ïa ki shiphew tylli ki kynhun yn phiah ha ki ar tylli ki group ki ban don mar san tylli na ka bynta hapdeng jong ki. Ki ar tylli ki kynhun ki ban wan ha ki kyrdan ba hakhlieh kin rung sha ka semi final.
Te kumta kitei ki kynhun kin hap ban ïakhun tyngeh na ka bynta kum ka lahduh kaba nyngkong (Champions of Cham-pions) bad ban ïoh khur ïa ka khusnam pisa kaba T. 8 lak tyngka.
Kumba ka long mynta saw na ki san tylli ki kyrdan ïalehkai jong ka SSA la lah ban pyndep bad kaba sah mynta ka long sa tang ka First Division kaba dangïaid shaphrang. Te kumta ïa kane ka Champions Cup yn sdang tat haduh ban da kut ka First Division.
Ki kynhun kiba la thikna ban ïashim bynta ki long ki lahduh bad kiba wan ba-ar ha la ki jong ki kyrdan ïalehkai. Ka Langsning bad ka Shillong Lajong na ka Shillong Premier League, ka Mylliem Lum bad Laitkyrhong na ka Second Division, ka Mawkriah West bad ka Umlyngka na ka Third Division bad ka Mawkasiang lem bad ka Mawlynrei na ka U-20 Fourth Division.
Te kumta na ka liang ka Organising Committee jong ka SSA ka la ailad ïa ki kynhun ïalehkai jong ka Second, Third bad Fourth Divisions ba kin shim wai (loan) san ngut ki rangïa-lehkai na ka bynta katei ka lympung khnang ba ki lah ban pyn-khlaiñ ïa ki kynhun jong ki.
Ïa kane ka Champions Cup ym lah ban ïathuh mano ban rah ïa ka nam lahduh bad wat ki kynhun ba khlaiñ bor kum ka Langsning bad ka Lajong ki dang don hapdeng ka jingartartien. Kum kine ki lympung kin wanrah ka jingkylla bad kan pynkynmaw ïa ki paidbah halor ka jingjop ka Wigan Athletic ha ka final jong ka FA Cup pyrshah ïa ka Manchester City ha ka aïom ïalehkai 2012-13 bad kane kan jia ruh ha ka SSA Champions Cup.
