Mairang, Risaw 24
Ka Pyndengumiong Govt. LP School Dom Marlong Pyndengumiong Mairang kaba hap hapoh Eastern West Khasi Hills District ha ka sngi Thohdieng ka la ïoh ban pynhap pyrda noh ïa ka jingrakhe dap 75 snem lane ka Platinum Jubilee da ka jingïalang kaba ishongkun ba la pynlong ha phyllaw ka skul.
Ha kane ka sngi pynhap pyrda ïa kane ka jingrakhe, u Bah Lahkmen Rymbui uba dei u Myntri ka tnat Pule Puthi u la ïadonlang kum u kong-san uba la pynhap ruh ïa ka lama jong ka skul kum ka dak ban pynkut ïa kane ka jingrakhe.
U Bah Lahkmen haba kren ha ka jingïalang, u la pynpaw ïa ka jingsngew diaw ba bun ki skul Sorkar ki long kum ki ‘khunswet’ namar ka jingbym don kiba shimkhia ban peit ïa ki.
Ha kajuh ka por, u kongsan u la pynpaw ïa ka jingsngew kmen halor ka jingkitkhlieh ka shnong Pyndengumiong kaba la pynïaid bad thung ruh ïa iwei i nonghikai kaba la siew tulop da ka shnong ha ryngkat ka jingnoh synñiang ki nonghikai bad kane ka jingleh ka long ka nuksa kaba bha tam ïa kiwei ki skul hapoh ka Jylla.
Shuh shuh u Bah Lahkmen u la pynpaw ruh ba ki don haduh 200 tylli ki skul kiba ym don khynnah skul satia hynrei ki don tang ki nonghikai ha kaba na ka liang ka Sorkar, kin sa khang noh ïa kine ki skul kiba khlem khynnah.
U la pynpaw ruh halor ka rai ba la shim da ka ïingbishar Supreme Court ba baroh ki nonghikai ki dei ban long kiba la pyndep ïa ka MTET lait noh kito kiba don sa san snem ha ka kam. U kyntu ruh ïa ki nonghikai ba kin long kiba la pynkhreh ïalade namar ki jingkylla kin wan katkum ka jingïaid ka por. U la pyntip ruh ba ka Sorkar ka la buh ïa ka thong ban pynïoh ïa ki skul building kiba kham heh bad ba kham bha, ban pynbiang ïa ki jaka leit shabar ha baroh ki skul bad ruh ki jaka shet (kitchen shed) na ka bynta ka jingdonkam jong ki khynnah skul.
U la ong ruh ba ki don shibun ki skhim Sorkar ba la mang na ka bynta ban kyntiew ïa ka ïoh ka kot ki nongshong shnong bad kumjuh ruh ïa ki samla, kumta u kyntu ïa ki ban shim ïa kane ka lad ban pyntreikam ïa ka na ka bynta ka jingmyntoi.
Shuh shuh ha kane ka sngi, la donlang ruh ka Deputy Commissioner ka Eastern West Khasi Hills District ka Kong Anita Kharpor, u Superintendent of Police Bah Dangsan Khyriem, u SDSEO Mairang Bah J Thyrniang, u Sordar ka shnong, u Headmaster, ki nonghikai, ki khynnah skul ha ryngkat ki kmie ki kpa bad kiwei-kiwei.
