Nongpoh, Risaw 24
U Senior Superintendent of Police (SSP) ka Ri Bhoi, u Vivekanand Singh Rathore ha ryngkat ka jingdon lang jong u Additional Superintendent of Police, Bah Orville Massar lem bad kiwei de ki heh pulit, ha ka janmiet ka sngi Thohdieng kila pynlong ïa ka jingkhynra naphang sa ïa ki trok kiba pynïeng beaiñ bad khlem-akor mar shiteng ka surokbah National Highway 6 na Byrnihat ter-ter shaduh sha Jorabat.
Kane ka mat, ka dei kaba bun na ki paidbah, ki heh ophisar bad ki nongïalam saiñ hima sima ruh kila ju ud ju nam la bun-bun snem, hynrei ym don ba shimkhia satia tad haduh mynta ka kynti hapoh ka jingïalam u SSP ka Ri Bhoi ba ki paidbah kila ïohi ïa ka jingtrei shitom jong ki bor pulit ban daiñ kuna bad weng mardor ïa kitei ki trok kiba pynïeng beaiñ hapoh u lain lieh jong ka surokbah, khamtam ka bynta kaba hiar na nongbah Shillong sha Guwahati.
Haba kren sha ki lad pathai khubor, u Vivekanand u la ong ba hadien ka jingtalasi kaba la dep ban pynlong ha kine ki taïew kiba la dep, mynta ka sngi la pynlong pat ha ki bynta naduh Byrnihat ter-ter haduh Jorabat, ka bynta jong ka surokbah kaba la mih shibun ki jingujor, la ka dei na ki ophisar Sorkar, ki pulit bad ki nongmihkhmat bad ki paidbah ruh kumjuh halor ka jingpynïeng khlem-akor jong ki trok haduh mar shiteng jong ka surokbah.
Utei u heh pulit ka Ri Bhoi u la ong ruh ba kane ka jingpynïeng beaiñ bad khlem-akor jong ki trok ha kitei ki bynta jong ka surokbah kaba jngai kumba 5-7 kilometer, bunsien ka wanrah ïa ka jingdheng kali kaba khah-khah bad ktah jur ïa ka jingïaid beit jong ki kali nalor ka jingjia tyngkhuh kali, kiba la shim ruh ïa kiba bun ngut ki mynsiem briew.
U la ïathuh ba ka dawbah jong ka jingpynïeng beaiñ bad khlem-akor ki trok ha kitei ki jaka, ka dei namar ka jingbym shah rung sha nongbah Guwahati (No Entry) ha ki kynta kiba dei naduh mynstep haduh janmiet bad ha kane ka jingtalasi, la bthah noh ïa kitei ki trok baroh ba ki dei ban leit rung lyngba ka jingkieng Jorabat bad sangeh sha ka surokbah ha ki thaiñ Sonapur ha kitei ki kynta, khnang ba kane ka surokbah kan kylluid bad pynsuk ïa ki nongleit nongwan.
U Vivekanand u la ïathuh ruh ba lyngba kane ka jingtalasi, kumba 70 persen na kitei ki trok kiba pynïeng beaiñ, la lah ban weng noh, lait noh kito kiba la sniew bad dang maramot, hynrei na ka liang ki pulit kin ïai pynlong ka jingkhmih manla ki kynta ha kine ki bynta, ka ban neh kumba saw lane hynriew sngi lynter ban weng lut ïa kitei ki trok na kitei ki bynta jong ka surokbah ha kaba u la bthah ruh ba ki nongñiah ïa ki trok bad kali khia (HMV) ba kim bit satia ban ïeng hapoh u laiñ lieh jong ka surokbah.
“Bun na ki nongñiah, ngi ju ïohi ba ki ïaid na ka liang ka mon, kaba long kaba bakla, ki dei ban ñiah lyngba ka liang ka diang, wat ñiah sted bad wat pynsangeh ïa ki kali hapoh u laiñ lieh. Ngin leh da kaba tyngeh bad khlem jingmap lada lap nangne shakhmat,” la ong u SSP bad bynrap ba kane ka jingleh kam dei satia ban pyndik lane ba pynduh nong ïa ki nongñiah trok, hynrei lada kim bud ïa ki aiñ ñiah kali, ym don lad da kumwei naba ka jingim ka dei kaba kongsan na baroh.
Ha kaba ïadei bad ka jingdon jong ki dukan maramot kali ha kitei ki thaiñ, ba bunsien ki trok, ki sangeh bad ïeng beaiñ bad khlem-akor, u SSP u la ong ba ki trai dukan ki dei ban pynthikna ba ki don ïa ki jaka ïeng kali kiba biang, bad lada kim don, kim dei satia ban plie dukan ha ka surokbah.
“Phi lah ban maramot kali ha ki jaka kiba biang ban nym thut ka leit ka wan jong ki paidbah. Bunsien ki kali kit nongpang, ki kali jong ki ‘riewheh ‘riewhain, ki shipai bad ki paidbah ki hap ban mad jingeh namar ka jingpynïeng kali beaiñ ha surokbah,” la ong u Vivekanand, bad maham ruh ïa kiba leh pyrshah bad wat ïa ki dukan ki jong ki ruh, yn hap ban khang khyrdep lada pyntreikam ïa ka aiñ majistor kaba la aibor ha u, kum u SSP ka Ri Bhoi.
Ha kaba wad jingtip pat halor ki jingjia tyngkhuh kali, u Vivekanand u la ong ba kila duna shibun ki jingjia tyngkhuh kali, lait noh kiba malu mala bad kane ka ai mynsiem ïa ki bor pulit ba kin dang ïai trei shitom shuh shuh ban wanrah jingshngaiñ ïa ka leit ka wan jong ki paidbah.
Katkum ka khubor na ki pulit, la ïathuh ba ha kane ka sngi, la ïoh ban daiñ kuna haduh T.5 lak tad haduh ka por 7 baje janmiet katba ka jingtalasi ka dang ïaid shaphrang, kata ym tang ïa ki trok kiba pynïeng beaiñ, hynrei wat ïa kito kiba ñiah ha ka jingshoh khawiang, kiba khlem deng jingda khlieh (helmet), ki bym deng seatbelt bad kiwei-kiwei de ki jingpynkheiñ aiñ ñiah kali.
