Shillong, Risaw 24
Ka Meghalaya Cricket Association ka la jied ïa ka kynhun kaba don 25 ngut ki nongïalehkai katkum ka jingai jingmut jong ka ‘senior women selection committee’ na ka bynta ka samoi ïalehkai ka BCCI domestic 2025-26.
Ïa kane ka jingjied la pynshong nongrim ha ki jingïalehkai ‘trial’ ba la pynlong dang shen bad kumjuh ruh katkum ka jinglah jong ki nongïalehkai ha ki jingïalehkai BCCI ha u snem 2023-24 bad 2024-25.
Ka MCA kan pynlong ïa ka bynta kaba ar jong ka jingpyrshang na ka bynta ki nongïalehkai ba la shah jied naduh ka 27 haduh ka 31 tarik u Risaw ha Nongkhrah, Nongpoh, bad hadien kata kan sa pynlong ïa ka ‘camp’ pynkhreh. Ka U-23 Women’s T20 Trophy kan dei ka lympung kaba nyngkong na ka bynta ka kynhun ïalehkai ka Meghalaya, ka ban sdang naduh ka 24 tarik u Naiwieng.
