U Nongsaiñ Hima, 1965
Kan jia kumno ïa ka pyrthei lada ka KTIEN kan duh noh? Sngewshyrkhei ban pyrkhat ïa ka apot ha ka pyrthei lada kane ka wan ban urlong shisha. Ka don kaei kaei kaba maïa ha ka KTIEN. Haka, don ka bor kaba lah ban pynlong ïa kiei kiei. Ha ka, ruh ka don ka bor kaba lah ban pynduh pyndam bad pynjot thiaw ïa kiei kiei. U Ioannis Apostol haba u kren shaphang jong ka, u ong, “Myndang nyngkong ka la don ka Ktien bad kata ka Ktien ka la don bad U Blei, bad kata ka Ktien ka la long U Blei. Kane ka la don bad U Blei naduh myndang nyngkong. Da ka la thaw ïa kiei kiei baroh, bad khlem Ma – ka ym shym la thaw ei ei kaba la thaw. Ha ka hi la don ka jingim bad kata ka jingim ki la long ka jingshai jong ki briew. Bad kata ka jingshai ka la shai ha ka jingdum, bad ki jingdum kim lah ban klun ïa Ka.”
Ka tynrai u Khasi ruh ka long ba u niew kyntang ïa ka Ktien. U da thew haba u kren ïa ka. Um ju nud ban pyndonkam thala ïa ka. U tip shai ba shisien u la pyndonkam kulmar ïa ka KTIEN u la duh la ka long rynnieng. Wat ha ka sngewbha, kum ka ïa – siat thong, u Khasi u kren da tyngkai ïa la ka KTIEN. U Sngewthuh ba u tang shu la bakla ka KTIEN, kata u la rem. Nangta ngi ju ong ba uta uba ai ksuid. Ym dei ba u phah da u ksuid ne u don ka bor ban pynshitom pynjynjar ïa uno uno uba la pynmong pynsngewsih ïa u. Em, u pynphai tang da ka ktien ïa kaba uta uwei pat u la kren lait bad kata hi ka la biang ban pynshitom pynjynjar ïa u. Bunsien ngi ju iohsngew ruh ba don ki briew kiba ngi ong kiba kthang ktien. Shisien ba ki la tim ïano ïano, uta uba shah tim u da kylla mrad artad.
Ha ka jingshem jong ki riewstad kiba mynta la ong ba ki la ong ba ym don kawei pat ka bor ka ban kham khlaiñ haba pyndonkam bha ïa ka bad ka ban kham shyrkhei haba pyndonkam bakla ïa ka, ban ïa ka KTIEN.
Ki riewstad kiba ha ka ktien phareng ngi khot ki “psychologist,’ la ong ba ki lah ban pule ïa ka jinglong jong u briew, kaba paw bad kaba rieh kumjuh, ne ban tip ba u mih na ka ïing ka sem kaba kumno bad kumta ter ter tang da kaba bishar ïa ka KTIEN kaba u pyndonkam ha kaba u kren.
Ka jingmaïa kaba don ha ka KTIEN ka long kaba palat da shisha ïa ka bor sngewthuh u briew. Hynrei kiba bun ki klet ïa kane. Ki kren ïa ka ktien khlem pyrkhat, ki kren mon, ki kylla ktien, ki thok, ki shukor bad ki ju pynksan ïalade da kaba ong, “Sa lei, ïa rat ïa ka ktien kaba ioh ei.”
Dei na kane ka daw ba mih kat kine ki jingkulmar ha ka pyrthei. Dei na kane ka daw ba ki ri kiba khraw ki duh ki dam noh. Bad, lah ban ong ruh, ba dei na kane ka daw ba ma ngi ki riewlum, ngim poi shano shano ruh ha ka jingthmu bad angnud jong ngi, namar kito kiba shimti ïa ka kam ban ïalam, ki la pyndonkam bakla ïa ka KTIEN.
Ka KTIEN namarkata ka long ka waitlam arliang syrti. Ym ba ka pynmynsaw pyrshah ïa kiwei hynrei ha kajuh ka por ka pynmynsaw ïa uta uba kren. Ka long kaba shongniam bad ba dei hok ba haba shwa ban ngin kren ngin da puson bha namar ka KTIEN kaba la khlei ka long kum ki sner ba la bret ha ka lyer. Kumba ki long kaba shitom ban lum pat ïa kita ki sner kiba la shah kit ha ka lyer kumjuh ruh ka long kaba kham shitom shuh shuh ban lum biang ïa ki ktien kiba la khlei.
Ki ktien kiba hok ki ktien kiba sbun ki long kum ka ngap. Ki shngiam ban mad, ki ai jingkhlaiñ ïa ki shyieng. Hynrei ki ktien kiba lamler ne ki ktien kiba khor ki long ka waitlam arliang syrti, ki ot ym tang ïa u nongsngap hynrei kumjuh ruh ïa u nongkren. Namarkata ngim dei ban ai huspai ïa la u thylliej ban padiah kulmar.
