Shillong, Risaw 24:
U Myntri ka tnad Arts & Culture u Bah Sanbor Shullai u la pynpaw ba ka tnad ka don ïa ka thong ban kyntiew ïa ka kolshor trai ri jong ka Jylla lyngba ka ‘Choir Festival’ kaba la long mynta ka sngi.
Haba kren sha ki lad pathai khubor, u Bah Sanbor u la pynpaw ka jingsngew kmen ba u la ïoh ban shim bynta ha ka ‘Meghalaya Tribal Indigenous Choir Festival’ kaba la pynlong da ka Young Men’s Christian Association (YMCA) ha ka jingïatreilang bad ka Shillong Public School lyngba ka jingkyrshan na ka Tnad Arts and Culture ka Sorkar Jylla.
U Bah Sanbor u la ong, “Kane ka dei ka sien kaba ar ba la pynlong ïa ka ‘Meghalaya Tribal Indigenous Choir Festival’ ha kaba kumba 12 haduh 13 tylli ki skul bad ki kynhun na ki jaka bapher-bapher jong ka Jylla ki la ïashim bynta. Kane ka tamasa ka long ban pyninam bad pynkhlaiñ ïa ki jingrwai tynrai jong ki Khasi, Jaiñtia bad Garo”.
“Ka jingthmu ba kongsan eh, ka long ban ïada ïa ka Kolshor Tynrai kaba kynsai bad ïa ki jingrwai tynrai jong ka Jylla Meghalaya. Ngi la ïakren ruh ba ha ka snem ban wan, ngin dang khot shuh-shuh ïa ki skul bad ki kolej ban ïashim bynta” u la ong.
U Myntri u la pyntip ruh ba ha ka 15 tarik u Naiwieng kan don sa kawei ka prokram halor ki kolshor bad riti dustur ki riewlum. “Kane ka prokram ka long ban khot ïa ki 115 tylli ki kynhun tynrai (traditional groups) na baroh ki bynta jong ka thaiñ shatei lammihngi ka Ri India ban ïashim bynta” u la ong.
