Nongpoh, Risaw 24
Haduh saw ngut ki briew ki la mynsaw, hadien ka kali Hyundai i20 kaba ki shong ka la kylla khongpong hapdeng surok kaba la jia ha ka janmiet sngi Thohdieng ha surokbah National Highway 6 ha Shangbangla.
Ka jingjia kylla khongpong jong kane ka kali i20 kaba don ïa u registration number ML05-L-2837 kaba dang kiew sha Shillong na ki thaiñ Byrnihat, ka la wan jia hadien ba ka la leit ban tynrah ïa u ‘divider’ jong ka surokbah bad jam sha shilliang ka surok tad haduh ba kan da kylla khongpong syndon.
Katkum ka khubor ba la ïoh lum, la ïathuh ba katei ka kali ka dei kaba la shong da saw ngut ki briew bad ka daw jong ka jingjia, la kynnoh ba ka dei namar ka jingpynher sted palat kat haduh ba u nongñiah um lah shuh ban tehlakam ïa la ka kali bad leit beit ban thom sha shilliang ka surokbah, ha ki jaka ba khongwaiñ kaba dang hap ha ka shnong Shangbangla ha Ri Bhoi District.
Ha katei ka jingjia, la ïohi ba ki bynta jong ka kali kiba nakhmat, kila julor bad ki briew kiba shong hapoh katei ka kali kynthup ïa u nongñiah kila ngat ha ka jingmynsaw ba malu mala bad na ka liang ki bor pulit ha ryngkat bad ki paidbah ki la ïarap ban pynïeng biang ïa katei ka kali bad ban ïarap sei ïa kiba mynsaw napoh jong katei ka kali.
