Shillong, Risaw 24
Ka Jylla ka la mad ïa ka jingduna slap bad ka jingtyrkhong haba ïanujor bad ka jingïoh slap ha ki snem ba la dep, ba katkum ka jinglum jingkheiñ naduh u bnai Jylliew haduh u bnai Nailur, ka jinghap slap mynta u snem ka long tang 43%.
Katkum ka jingïathuh u Thangjalal Lhouvum uba dei u khlieh jong ka Meteorological Centre Shillong, ka Jylla ha ki snem ba la dep ka ju ïoh slap haduh 2695.3 mm man la u snem katba mynta u snem ka Jylla ka ïoh slap tang 1.544.9 mm, kaba la long ka snem ba tyrkhong slap ha ka Jylla.
Hapdeng ka jingduna slap kaba jur ha ka Jylla, ka South West Khasi Hills ka la long ka District kaba kyrpang bha ha ka jingïoh slap mynta u snem, namarba ka jinghap slap ha katei ka district ka long haduh 3,030 mm kaba long palat ïa ka jingïoh slap ha ki snem ba la dep kaba long tang 1.851 mm.
U Thangjalal u la ong, ba ka jinghap slap ha ka Jylla ka la nang hiar katba dang ïaid ki snem, ha kaba wat ka Mawsynram bad ka Sohra kiba bat ïa ka nam ba jur slap tam ha ka pyrthei, katba mynta u snem ki mad ïa ka jingïoh slap duna bha, katba ka Ri-bhoi ka ïoh slap 43%, ka West Garo Hills ka ïoh slap 51% bad ka West Khasi Hills ka ïoh 50%.
U la ong, ba ka Jylla Meghalaya ka la mad ruh ïa ka jingkiew ka jingkhluit, ha ki 5 haduh 10 snem ba la leit, na ka jingshit kaba kiew ha ki katto katne ki District, ka jingjur tam ka jingshit ka long ha baroh ki District ha Garo Hills bad wat ka Sohra ruh ka la mad ïa ka jingshit kaba jur ha kine ki snem.
Kiwei pat ki District kum ka West Jaintia Hills ka ïoh slap 75%, ka East Jaiñtia Hills ka ïoh slap 60%, ka South West Garo Hills ka ïoh slap 64%, katba ka East Garo Hills bad South Garo Hills ki la ïoh slap kumba ki ju ioh man ka por.
