Shillong, Risaw 24
U MLA ka Mawsynram Konstitwensi u Bah Olan Sing Suiñ ha ka 24 tarik u Risaw 2025, u la leit ban jurip ïa ki ar tylli ki Ropeway kiba la dep shna kiba don ha ka Shnong Thyllaw.
Kine ki ar tylli ki Ropeway kiba la dep shna, ki la ai jingïarap shibun ïa ki nongshong shnong, ba kynthup ïa ka shnong Nongrim Warding bad ka shnong Mawdingkhit ki bym pat lait surok, ban pynhiar bad pynkiew ïa ki marbam-marrep.
Ha kane ka sngi nalor u MLA, la wan ban synranlang ruh u Bah Iaikmenlang Warshnong Rangbah Shnong ka Mawdingkhit, u Bah Personal Kharlyngdoh Rangbah Shnong ka Thyllaw, Kerlang Sohtun Rangbah Shnong Nongrim Warding, Kmenbarohlang Iangjuh, BADO ka Mawsynram, Nathan Tariang Assistant Director, border areas department, Nathaniel Lyngdoh I/C Superintending engineer, Directorate of agriculture, Bisharlang Wanniang, horticulture developement officer, EKH district bad kiwei-kiwei de.
Ka shnong Nongrim Warding bad ka shnong Mawdingkhit ha ki por ba la dep ki shu kit ïa ki marbam bad ki marrep da ka bor met la jong bad kumba da ki kynta ban poi shaduh sha shnong Thyllaw hynrei mynta pat ka kynti kim donkam shuh ban kit da ka bor met namar ba la shu pynhiar bad pynkiew beit ïa ki mar da ka Ropeway bad kaba shim por tang kumba 1 minit eiei.
La ïohi ruh lyngba ka Ropeway kaba na shnong Thyllaw ki la pynhiar ïa u phan ba shi byrni ban pynpoi shaduh sha shnong Nongrim Warding bad sha Shnong Mawdingkhit.
Haba kren ha kane ka jingjurip ïa kitei ki Ropeway, U Bah Olan Sing Suiñ u la ong ba ïa kine ki Ropeway la shna da ka Border Area bad ba la bei pisa da ka Tnad Agriculture lyngba ka PM-RKVY – State Scheme 2024-25.
U la ïathuh ruh ba ka Ropeway yn sa shna haduh 3 tylli bad kine ar tylli kiba don ha shnong Thyllaw ki la dep lut bad sah sa kawei kaba dei ha ka Shnong Nongrim Warding ban pynhiar ïa ki mar sha ka shnong Mawdingkhit.
Nalor kata, u la ïathuh ruh ba kawei-kawei ka Ropeway la shna ha ka dor T.33.12 lak bad baroh 3 tylli ki Ropeway ka la poi kumba T.1 klur tam eiei.
“Ka long ka jingmyntoi shibun ïa ki nongrep ba ha jaka ba kin kit da u briew da ka bor met hynrei mynta la kit lyngba kane ka Ropeway. Ka jingkhia ban kit kane ka Ropeway ka long 50 kilo,” la ong u Bah Olan.
Na ka liang ki rangbah shnong jong kitei ki 3 tylli ki shnong ki la pynpaw ka jingai khublei ïa u MLA bad ïa ki ophisar kiba la shim khia ban pynpoi kloi ïa kane ka Ropeway, kaba ai jingïarap shibun ïa ki paidbah nongshong shnong.
