Shillong, Risaw 24
Uwei u samla pule jong ka Synod College, uba dang 22 snem ka rta u la ngam jyllop ha ka por ba u leit jngi bad la u paralok ha ka wah ha Sohkhmi kaba don ha ki thaiñ Sohra, East Khasi hills District.
Une u samla pule ïa uba la tip kyrteng kum u Ricky Thangkhiew u dei uba shong ba sah ha shnong Nongkseh Block-6, Laimer, Upper Shillong.
Kane ka jingngam jyllop ka dei kaba la jia myn ha ka sngi ka 23 tarik Risaw, 2025 haba kine ki samla pule na Synod College ki la ïa pynbeit para khynnah pule ban leitkai sha Sohkhmi da ka bos.
Ki nonghikai ka Synod College ki la ïoh jingtip ïa kane ka jingjia ba sngewsih ha ka janmiet jong ka 23 tarik Risaw da ka jingpyntip u nongñiah bos.
Shuh shuh la ïoh jingtip ruh ba ka College ka la phah ïa ki nonghikai ha ka sngi Thohdieng ban leit sha Sohra.
Katkum ka jingïoh lum khubor, ka jingjngai kane ka wah Sohkhmi ha ka por hiar hap ïaid kjat kumba ar kynta na Sohra.
Haba ki katto katne ngut ki nonglum khubor ki leit ban ïakynduh ïa ka Principal jong ka Synod College, Shillong, ka Dr. G Lyngdoh ka la pynshai ba ka college ka khlem tip eiei ïa ka jingpynbeit leitkai kine ki samla pule sha Sohkhmi namar ka dei ka jingpynbeit para ma ki hi hynrei la ïoh jingtip ha ka por janmiet ba ka la don ka jingjia ba sngewsih.
Ka la pynpaw ka jingsngewsih halor kane ka jingjia.
Haba u nonglum khubor u la leit sha ïingsah sha Nongkseh, la ïoh ban ïakren bad ka samla Bansabet Thangkhiew kaba dei ka hynmen jong u samla Ricky Thangkhiew, uba la ngam jyllop ha Sohkhmi Sohra ha kaba ka la ïathuh ba u Ricky Thangkhiew u dei uba pule ha ka 3rd Semester ha ka Fashion Designer.
Ka la ïathuh ba hashwa ba un leit kai bad ki para klas u la dep ïathuh shwa ha ïing bad ha ka kmie bad hashwa ban mih na ïing mynstep ruh ki la pynlong da ka jingduwai bad u mih da ka jingsuk na ïing bad kum ka ïing ka khlem poi pyrkhat ba kan jia haduh katne.
Ha kaba ïadei bad ka jingngam jyllop, na ka liang ka hynmen kam lah ban tip dei na kaei ka daw.
Shuh shuh ka la ïathuh ba kam don jingtip la na klas ki don jingtip haba u leit kai sha Sohra hynrei u la pyntip ba ki don ar tylli ki bos, kawei kaba mynstep bad kawei kaba mynsngi hynrei u samla Ricky u leit mynstep namar u dei uba leit klas mynstep.
Ka la ong ruh ba naduh ba jia naduh mynnin hi kiba ha ïing ha sem ki la leit sha katei ka jaka ba ngam jyllop bad haduh mynta ki dang don sha Sohra.
Ki pulit ka Sohra Civil Sub Division, East Khasi Hills, ka kynhun Search and Rescue Team jong ka Meghalaya Fire & Emergency Services kiba la hiar sha Sohkhmi ki la ïoh ban sei ïa ka met jong une u samla ha ka por nohphai sngi jong ka sngi Thohdieng.
