Shillong, Risaw 24
U Executive Member (EM) ka Khasi Hills Autonomous District Council (KHADC) ba khmih ïa ka tnat Council Assets, Bah Pynkhraw-boklin Kharjahrin u la pyntip ba ka District Council ka kloi ban ai No Objection Certificate (NOC) ïa ka Sorkar Jylla ban maramot ïa ka surok na Wahkaji sha Nongtnger ha South West Khasi Hills.
Ïa kane na ka liang jong u EM u la pyntip haba jubab ïa ka jingkylli bala wanrah da u MDC ka Ranikor, Bah Pius Marwein uba la pyntip ba ki paidbah na ki 11 tylli ki shnong ki kwah na ka KHADC ba ka dei ban aiti noh ïa ka surok Wahkaji sha Nongtnger sha ka tnat Public Work Department (PWD) ka Sorkar Jylla khnang ban ïoh maramot namar ïa kane ka surok la shu ieh khlem da maramot mynta da ki phew snem.
U Bah Pius u la ïathuh ba ka surok naduh Wahkaji lyngba ka Nong- tnger shaduh Mawthabah ka don 21 km bad ka ïaid lyngba 11 tylli ki shnong kiba la mad jingeh mynta da ki phew snem namar ka jingsniew palat ka surok.
Haba jubab ïa ka jingkylli, u EM u la ïathuh ba ha u snem 2006 ïa ka surok Wahkaji shaduh Mawthabah kaba don 21 km la bei tyngka da ka UCIL kaba kwah ban tih Uranium hynrei hadien ba kam ïoh lad ban tih Uranium, ïa kane ka surok ruh la shu ieh khlem da maramot.
U EM u la ong ba ka jingkyntait ka District Council ban aiti noh ïa ka surok Wahkaji sha Nongtnger ka dei namar ba kane ka surok ka ïaid lyngba ki shnong ba don uranium bad ka KHADC ka kwah hi ban ïai long trai ïa ka surok bad ïa ka jaka ban pynskhem ïa ka jingpyrshah tih Uranium.
“Ngi kloi ban ai NOC ïa ka tnat PWD ka Sorkar Jylla lada ka kwah ban maramot ïa ka surok hynrei ngin nym aiti pat ïa ka surok namar ngi kwah ban bteng long trai hi ïa ka surok bad jaka,” la ong u EM.
Haba bteng ban buh jingkylli, u MDC ka Ranikor u la ong, “Nga kyntu ïa u EM bad ïa ka EC ban leit jurip ïa ka surok bad sngap ïa ka sur jong ki paidbah kiba ïai mad jingeh namar ka jingsniew palat ka surok Wahkaji-Nongtnger”.
U la pynpaw ba ka district council kam dei ban pynkylla langkñia ïa ki paidbah kiba shong ba sah ha katei ka thaiñ tang namar ba kane ka surok ka leit sha jaka ba don u marpoh khyndew uba rem hynrei ban pyrkhat lang ïa ka khia ka shon jong ki paidbah haba ki pang ki shitom.
Na ka liang u EM haba jubab u la ong, “Ka District Council kam don pisa ban maramot” bad la bynrap da kaba ong, “Ngi kloi ban ai NOC lada ka Sorkar Jylla ka kwah ban maramot”.
