Seoul, Risaw:
Katkum ki khubor, la ioh jingtip ba ka North Korea ha ka Sngi Balang ka la ther biang sa uwei pat u ‘namding ‘Ballistic sha ka duriaw ba sha phang Shatei Lam Mihngi jong katei ka ri.
Ka jingpynbna lyngkot na ki heh shipai jong ka South Korea kam shym la ai jingpynshai tikna pat haduh katno utei u ‘namding u la poi ka jing jngai ha katei ka jingpyrshang pynher ia u.
Kane ka jingpynbna paidbah ka long katto- katne sngi shwa ba ka South Korea kan pynlong ïa ka jingïalang jong ka Asia-Pacific Economic Conference. U President ka U.S. Donald Trump, u President ka China u Xi Jinping bad kiwei kiwei ki nongialam ka pyrthei kin ia lum lang ha ka nongbah Gyeongju jong ka South Korea naka bynta ban iakren ha ka taïew ban wan.
Ha kaba sdang jong une u bnai, u Kim Jong Un, nongialam jong ka North Korea, u la pyni ia u namding ba thymmai uba lah ban lah ban pyni jngai, ha ka jingiaid pyni nam jong ki shipai kaba heh bha ha ka nongbah Pyongyang, ha kaba ki nongialam ba ha khlieh duh jong ka China, Russia bad kiwei kiwei ki la don lang. Katei ka jingïaid pyni nam lane ka ‘Parade’, ka long ha ka sngi ba rakhe ïa ka jingdap 80 snem jong ka jingthaw pyrthei ïa ka Workers’ Party kaba synshar, ka la pynpaw ïa ka jingroi jong u Kim ha ka kam saiñpyrthei bad ka jingpyrshang ba khlem sangeh jong u ban tei ïa ka jaka buh tiar ïaleh kaba lah ban thmu ïa ka dewbah America bad ki nongïaleh pyrshah jong u ha Asia.
