Shillong, Risaw 24
Ka 1st All Shillong Interschool Swimming Championship 2025 kaba la pynlong da ka True North Fitness Centre bad ka Swimming Academy ka la sdang ha ka 24 tarik Risaw 2025 ha Lapalang centre.
Kane ka lympung ïakob jngi ka dei ka jingïalehkai kaba ar sngi ha ka pung jngi ba la pynlong hapoh ka True North, ha kaba palat 155 ngut ki khynnah skul na ki 25 tylli ki skul ha kylleng ka nongbah ki ïashim bynta, ba la wan kyrshan da ki paralok, ki bahaïing-hasem bad ki nongkyrshan kiba ai mynsiem ïa ki ha ka jinglong jong ka jingïakhun kaba itynnad bad kaba bha.
Ha kane ka sngi sdang la plie da u Bah Keith Syiemlieh uba dei u dkhot ba rangbah tam jong ka True North Centre.
Ha ka sngi banyngkong la sakhi ïa ka jingïakhun kaba shlur na baroh ki skul, khamtam hapdeng ka St Edmund’s, St Anthony’s, Assam Rifles Public School (Sports), Khasi Jaiñtia Presbyterian Girls HS School, Seven Set School, Pine Mount School, Loreto Convent bad kiwei-kiwei.
La pynlong ha kane ka sngi 26 tylli ki jingïalehkai, ba kynthup ïa ka jingïakop jngi ba 100m freestyle, 100m breaststroke, 50m backstroke, grueling 200m individual medley, na ka bynta ki khynnah shynrang bad kynthei, kiba la phiah ha ki kyrdan rta bapher-bapher – 18-20, 15-17, 13-14, 11-12 bad 9-10. Ïa ki jingsdang ïakop ha ki kynhun (group) la pynlong ha ka por mynstep katba ïa ka final la pynlong ha ka por nohphai sngi.
La sam ïa ki takma na ka bynta ki jingïalehkai ha kane ka sngi ha ka por janmiet. Saw ngut ki riew donburom ki la leh ïa ki jingpynkup burom – u Kishore Subba, u dkhot ba la kham rangbah jong ka Meghalaya Swimming Association, u Bah Aubrey Laloo, u trai jong ka Body Zoo Gym bad u nongprat lynti ïa ka kam pynheh dohksah ha Shillong, bad arngut ki samla ba stad tam kiba long nuksa – ka Rifiness Warjri, ka briew kaba khynnah tam na Meghalaya ban kiew sha u lum Everest, bad ka Bonifilia Shullai kaba dei ka dkhot jong ka kynhun ïalehkai phutbol jong ka ri India U-17 ka kynhun ki kynthei.
Ka jinglehkai kan bteng ha ka sngi kaba ar jong kane ka lympung ka ban sdang ha ka por 10 baje mynstep. Ka Editor jong ka kot khubor The Shillong Times ka Kong Patricia Mukhim ka la mynjur da ka jingsngewbha ban long kum ka kongsan ha kane ka sngi.
