New Delhi, Risaw:
Ka India kan ym kyrkieh ban soi ïa kino-kino ki jingïateh khaïi pateng bad kan kyntait ïa ki kyndon na ki ri ba ïatreilang kiba khanglad ïa ki jingjied khaïi pateng jong ka, la ong u myntri ki kam khaïi pateng u Piyush Goyal ha ka sngi Thohdieng.
Ka Ri ka dang ïakren ïa ka jingïateh kular khaïi pateng da kaba laitluid ba la ap slem bha bad ka European Union, ha kaba ki jingïapher ki dang sah halor ka jingïoh rung sha ki kam ïa die ia thied, ki jinglong jingman jong ka kane ka bynta, bad ki kyndon naduh ka tynrai.
Ka jingiakren khaïi pateng bad ka America, kaba la buh khajna 50% ïa ki mar ba shalan shabar jong ka India, bad katto katne kiwei pat ki ri, ruh ki dang ïaid shakhmat.
U Goyal u la ong ba ka New Delhi kan shim ïa ka lynti kaba thikna.
“Ka India kan nym ïa soi ïa kano kano ka jingïateh khaïi da kaba kyrkieh”, la ong u Goyal haba kren ha ka jingïalang jong ka Berlin Global Dialogue ha ka por ba u leit jngoh ba kyrpang jong u, da kaba kdew ïa ka jingsngewkhia jong ka Europe halor ka jingbteng jong ka India ban thied ïa ka umphniang jong ka Russia.
Ka EU, ka United Kingdom, bad ka America, ki pynbor ïa ka New Delhi, ba kan pynduna ïa ka jingwanrah ïa ka umphniang jong ka Russia, kaba la pynduna dor, kaba ki ri Sepngi, ki kynthoh, ba ka ïarap ban bei tyngka ïa ka jingthmu thma jong ka Moscow, ha Ukraine.
Ka India ka la ïada naduh mynshwa ïa ka jingthied bor ding jong ka kum kaba donkam bha ban pynthikna ïa ka jingpynbiang kaba rem dor bad ka jingïada ïa ka bor ding, hynrei ki karkhana pynkhuid umphniang jong ka India mynta ki la pynkhreh ban pynduna jur ïa ka jingwanrah umphniang na Russia ban kohnguh ïa ki jingpynjari ba thymmai jong ka US ïa ki ar tylli ki nongpynmih umphniang ba kongsan jong ka Russia.
