Shillong, Risaw 24
U Myntri ka tnad Arts and Culture, u Bah Sanbor Shullai u la pynbna ïa ka jingthmu ban pynïeng biang ïa u mot dur ba shi rynïeng jong u Tirot Sing Syiem, uba dei u nongïaleh laitluid ka Ri Khasi, ha nongbah Dhaka, Bangladesh.
Haba kren sha ki nongthoh khubor ha ka sngi Thohdieng u Bah Sanbor u la pynpaw ba u la don ka jingthmu ban ïakren ïa kane ka kam bad ka Indian Embassy ha Bangladesh ban bishar bniah ïa kane ka kam.
U Bah Sanbor u la pynpaw ka jingsngewdiaw haba ïadei bad ka jingjia ba la dep, ba u mot dur jong u Tirot Sing Syiem u la shah pynpait pynpra da ki paidbah ka Dhaka ha ka por ba don ka jingïa huri hura hapoh katei ka Ri.
U la pynpaw ba ka jingtei ïa utei u mot dur jong u Tirot Sing Syiem ruh ka dei ba la sdang ha ka por ba u dang long kum u Myntri ka tnad Arts & Culture ha ka por jong ka Sorkar MDA-I.
U la pynpaw ba halor kane ka mat u la ïakren bad u Commissioner & Secretary u Bah Frederick Roy Kharkongor, IAS ïa ka jingthmu ban leit jngoh dalade ïa katei ka jaka ban pynlong ka jingpeit thuh bha bad ban shna biang ïa u mot dur ba shi rynïeng jong u Tirot Sing Syiem.
“Ngin sa pynbeit ïa ka por bad ngan sa leit dalade hi ban jngoh ïa ka jaka namar ngi hap ban shna biang ïa u mot dur ba shi rynïeng jong u riewshlur bad nongïaleh laitluid ka Ri Khasi” la ong u Bah Sanbor bad u la ban jur ba u mot dur ba thymmai un long u ba heh bad u ba shirynïeng jong u Tirot Sing Syiem.
