Shillong, Risaw 24
U MDC ka NPP na Mawsynram Konstitwensi, Bah Alvin K Sawkmie u la pynpaw ka jingbym hun namar ka jingbym ïoh ka jubab kaba shai halor ka jingslem ban pyllait ïa ka pisa kaba dangsah haba la dep shna ïa ka ïew ha Mawsynram.
Kane ka jingbym hun u Bah Alvin ka dei namar ba u Executive Member (EM) ba khmih ïa ka Council Assets u Bah Pynkhrawboklin Kharjahrin um shym la lah ban ai jingtip kaba shai ïa ka tarik bad u bnai haba u phah ïa ki kot ki sla sha ka tnat pla tyngka ban pyllait ïa ka pisa kaba dang sah namar u la ong ba um kynmaw shuh.
Kane ka jingkylli kaba la wanrah da u Bah Alvin ka dei ha ka kynta kylli jingkylli jong ka dorbar synrai ka Khasi Hills Autonomous District Council kaba la kut ha ka sngi Thohdieng ka 24 tarik Risaw 2025.
U Bah Alvin u la ong ba ka jingslem ban plie ïa ka Market Complex kan pynduhnong ïa ka council namar hap ban pynbha biang lada la plie namar mynta ka la dap shisnem haba la dep pyntrei.
U EM u la ïathuh ba ka pisa kaba dang sah ban pyllait ïa u kontraktor ka long sa hynñiew lak duna hynrei kaba sah mynta ka dei ha ka jingpeit bniah na ka tnat pla tyngka.
Na ka liang u Bah Alvin u la pynpaw ka jingbym hun namar ba u EM um shym la lah ban ai jubab haba u kwah ban tip mynno u phah ïa ki kot ki sla sha ka tnat pla tyngka.
Na ka liang u Bah Titos Chyne uba dei u nongïalam ka Liang Pyrshah u la ong ba u EM u dei ban pynkhreh bha ïa ka jubab haba u la ïoh ïa ka jingkylli shaphang ka ïew ha Mawsynram.
