Shillong, Risaw 24
Ka Khasi Students Union (KSU) South West Khasi Hills District Unit ka la pyntip paidbah ba kumba ju leh man la u snem naduh u snem 2021 ba ha ka lyngkhuh sngi ïap jong i Mei-ieid Spility Lyngdoh Langrin la rakhe ïa ka sngi pyrshah Uranium, mynta u snem ruh kin pynlong ïa ka jingrakhe ïa ka sngi pyrshah uranium (Anti – Uranium Day) ha ka 28 tarik u Risaw (October) 2025.
Ha ka kyrwoh ba la phah da u samla Macdonald Marbañiang, Publicity Secretary, KSU South West Khasi Hills District u la ong ba kane ka sngi ka dei ruh ka lyngkhuh sngi ïap ba 5 snem jong i Mei-ieid Spility Lyngdoh Langrin. Ïa kane ka jingrakhe ka seng ka la pynbna paidbah ba yn sa leh ha ka shnong Domïasiat, South West Khasi Hills District.
U la pynkynmaw ruh ba ka KSU ka shim ïa i Mei-ieid Spility Lyngdoh Langrin kum i wei na ki nongïalam ha ka jingïakhih pyrshah uranium naduh ki snem 1990 haduh ka sngi ka jingïap jong i ha ka 28 tarik u Risaw 2020.
“I ne i riewkhraw ym tang ba i la pyni ïa ka jinglong shlur jong i ha ka jingpyrshah uranium hynrei i la ïeng ruh ha ka nongrim baskhem ba i la kyntait ruh ïa ka spah klur mynba ka Sorkar India bad ka UCIL ka la tyrwa sha i na ka bynta ban ïoh tih ïa u uranium,” la ong u samla Macdonald.
U samla Macdonald u la ong ruh ba ka KSU ha katei ka sngi rakhe pyrshah uranium, ka shim ruh ïa ka jingpynskhem jingmut ha ka nongrim ba da lei-lei kan nym ailad ïa ka jingpyrshang ban tih uranium ha ka thaiñ Domïasiat bad Mawthabah.
“Ngi la pynskhem ruh ïa ka rai ba ngin nym ailad ïa ki Pre – Uranium mining activities ne kino-kino ki kam ban ïadei bad ka kam uranium la ka long na ka Sorkar Jylla ne kino-kino ki tnad na ka Sorkar India,” u la bynrap.
Kumta u ong ba ka KSU ka la khot la wer ïa baroh ki paradoh parasnam ban ïa mih ryntih ha ka 28 tarik (sngi Ba-ar) ban wan sha ka shnong Domïasiat, ha kaba kan don shwa ka jingïalang ban rakhe ha kato ka sngi ha Domïasiat ha ka por 11:30 mynstep hashwa ban ïa leit buh syntiew lang sha u lum jingtep jong i Mei-ieid Spility Lyngdoh Langrin.
