Mawkyrwat, Risaw 26
Ka Khasi Students Union (KSU) Ranikor Circle ka pynpaw ïa ka jingsngewkhia kaba jur ha kaba ïadei bad ka jingsahkut kali khah khah ha ka surok Ranikor, Phodkroh,Umpung, Balat shaduh Mawsynram ha kaba ki paidbah na ka por sha ka por ki ju ïakynduh jingeh khamtam ha ka por pang por shitom namar ka jingpynwit jong ki trok kiba kit ïa ki coke.
Katkum ka kyrwoh khubor na u samla Firstborn Turnia, Organising Secretary ka KSU Ranikor Circle u la ong, kane ka jingpynwit jong ki trok ka la ktah shi katdei eh ïa ki paidbah ha kaba bunsien ki ju jia ki jingkdiah jong ki jingkieng, ki jingkylla kali bad ka jingduh kali.
Kumta ka seng ka buh ka jingkyntu ïa ka Sorkar bad ki bor pynïaid district ba kin shimkhia mardor haba ïadei bad kine ki jingeh. Ka seng ka la ong ruh ba lada kim lah ban leh eiei, ka seng kam banse ban mih sha surok ryngkat ki paidbah bad ka seng ka la dawa ruh ba dei ban pyntreikam mardor ïa ka jingkit 9 ton ïa ki trok kiba ju kit ïa ki coke da kaba bynrap ruh ba ka surok bad ki jingkieng kim pat ïahap ban kit palat pud namar ka dei ka surok ba rit.
