Shillong, Risaw 26 (UNI)
U nongïalam ka Bharatiya Janata Party (BJP) ha ka Sngi U Blei u la kyrshan na bynta ka jingpyntreikam ïa ka National Register of Citizens (NRC) ha ki jaka thor ka West Garo Hills District, namar ka jingsheptieng ïoh ba katei ka thaiñ kan kylla long kum ka “Mini Bangladesh”.
“Ka thaiñ jong ngi ka la sakhi ïa ka jingkiew kaba shyrkhei bad kaba khlem peitngor haba phai sha ka jingbun (briew) jong ki Muslim kiba kren Bengali, kiba bun na ki, kiba paw kum ki bym don kot don sla bad kiba lah ban long ki nongwan buhai shnong be-aiñ na shiliang khappud Bangladesh,” ong u Peterjob Sangma, General Secretary ka BJP na West Garo Hills, ha ka shithi ba la thoh sha u Myntri ka tnad kam pohïing ka Sorkar Pdeng, u Amit Shah.
“Kane ka mat, ka bym ju da kham jia koit, mynta ka la wanrah ka jingkylla ha ka jingbun briew, kaba la pynmih ïa ka jingsngewkhia kaba jur hapdeng ki trai-ri trai-muluk bad ki trai shnong jong ka Ri-lum Garo,” u la ong.
U Sangma u la ong ruh ba ki jaka thor khamtam ka Phulbari, Rajabala, Tikrikilla, bad ki shnong ba markhap ki la sakhi ïa ka “jingkiew kaba shyrkhei bad kaba khlem peitngor” jong ki nongwan buhai shnong ba khlem kot khlem sla bad kiba lah ban wan rung be-aiñ na shiliang khappud Bangladesh.
“Ka don ka jingsheptieng kaba jur hapdeng ki nongshong shnong ba ka West Garo Hills ka lah ban kylla long ka ‘Mini Bangladesh,’ kaba lah ban wanrah ïa ka jinglong-jingman ha kaba ki trai-ri trai-muluk kin kylla long ki rit paid ha la ka jong ka jaka,” la pyntip u Sangma sha u Myntri tnad kam pohïing ka Sorkar Pdeng.
“Kine kiba la kynnoh nongwan buhai shnong be-aiñ ki la kyntur sha ki jaka paidbah bad ki jaka khlaw khlem ki kot ki sla kiba biang katkum ka aiñ – ki la ïoh bad bat be-aiñ ïa ki jaka rep bad kumta ki la ïarap ha ka ban pynbun ïa ki nongthep ‘vote’ ba khlem ki kot ki sla kiba biang bad kiba bat ïa ki ‘Card’ rashon kumjuh,” u la bynrap shuh-shuh.
Wat hapdeng ka jingsngewkhia kaba na ka por sha ka por bad ki jingpyrshang na ka liang ki NGO, ki seng samla, bad ki bor shnong, u Sangma u la kynnoh ba baroh ar – ka Garo Hills Autonomous District Council bad ka Sorkar Meghalaya kim shym la lah ban shimkhia ha ka ban weng ïa kane ka jingeh jong ka jingwan rung kyrthep.
“Ym shym la don ka jingjurip ne jingpynshisha kaba bniah halor kine ki kynhun paidbah bathymmai. Ki BSF bad ki pulit ki dang duna shi kat dei ha kane ka bynta jong ka Jylla, kaba ailad pat ïa ka ïaid ka ïeng kaba suk na shiliang sha shiliang khappud lyngba ki jaka kiba lait lyngba,” u la ong.
Nalorkata, u la ong ba ka jingbym don ki jingpeitbniah kiba pyrkhing bad kiba lah ban pyntreikam pyrshah ïa ki nongwan buhai shnong, ki jingkhmih bniah ïa ka jingbun briew, bad ki lad peit bniah ha ka thaiñ ka la wanrah ïa ka jingbymhun bad jingbymshngaiñ hapdeng ki nongshong shnong trai-ri trai-muluk.
Haba kyntu ïa u Myntri kam pohïing ka Sorkar Pdeng ban pyntreikam ïa ka NRC ha ki jaka thor jong ka Ri-lum Garo ha ryngkat ka tarik ot kyrteng kaba shai bad ki lad pynshisha kiba biang, u Sangma u la ong ba dei ban phah ïa ki kynhun ka Sorkar Pdeng ba khmih ïa ka jingshngaiñ, lada donkam, ban pynlong ïa ka jingpeit bniah kaba laitluid halor ka jingseng shnong ki briew bad ki jingthoh jaka ha ki jaka ba i-don ka jingsuba.
“Dei ban thaw ïa ka ‘Special Investigative Task Force’ ban eksamin ïa ka jingshim jaka be-aiñ bad ka jingpynrung kyrteng nongthep ‘vote’ ha ki jaka ba dang shu seng shnong thymmai,” la ong u Sangma.
