Shillong, Risaw 26
U MP ka VPP na Shillong, u Dr. Ricky A.J. Syngkon u la bthah ïa u Deputy Commissioner ka Ri-Bhoi District ban tohkit halor ka jingkynnoh ïeng ba khlem jingbit jong ki trok ha shilynter ka surokbah National Highway 6, khamtam naduh 14 Mer shaduh Jorabat.
“Da kaba buh jingmut ïa kane, nga kyrpad da ka jingburom ïa ka ophis ba bha jong phi ban tohkit ïa ki daw tynrai kiba pynbor ïa ki nongñiah trok ban pynïeng kali ha shi lynter ka surokbah – kum ka jingbym don ki jaka pynïeng kali kiba biang, ka jingpynslem ban kyntiew/pynhap mar lane ka jingbym biang ka jingpyntreikam,” ong u Dr. Syngkon ha ka shithi jong u ha ka Sngi Saitjaiñ.
U Dr. Syngkon u la pynpaw ba ka jingeh kaba dang ïai bteng ka la wanrah ïa ka jingdheng kali kaba jur, kaba pynthut ïa ka ïaid ka ïeng ki kali, bad ka jingma kaba khraw ha ka liang ka jingshngaiñ na ka bynta ki nongleit-nongwan bad kiba ïaid ba ïeng ha surok.
U la kdew ba ïa ka lynti ïaid kali kaba ar-lynti la pynduna noh sha kawei ka lynti namarba ïa ki trok la shu iehnoh harud surok, kaba wanrah pat ïa ka jingpynslem ha ka jingïaid ki kali bad kaba buh ïa ka jingma kaba khraw, khamtam hapdeng ka jingbym lah ban ïohi bha ne ka jingbym biang ha ka jinglong-jingman ka suiñbneng.
Na ka liang u Dr. Syngkon u la kyrpad ïa u Deputy Commissioner ban pyrkhing bha ïa ka jingpynïeng kali ba khlem jingbit harud surok, bad ban ïatreilang bad ka National Highways Authority of India (NHAI), ban wad bniah ha ka ban thaw ïa ka jaka pynïeng trok kaba kyrpang ne ka ‘Lay-By’ ne ‘Parking Area’ ha shi lynter ka surokbah NH-6 ha Ri-Bhoi District.
Shuh shuh u MP u la ban jur ba ka jingshimkhia kaba sted bad kaba treikam ka long kaba donkam eh na bynta ka jingïaid beit ïaid ryntih ki kali bad ban kyntiew ïa ka jingshngaiñ jong ki paidbah ha shi lynter jong kane ka surokbah kaba kongsan, kaba long ruh ka lynti ïaid kali kaba kongsan na ka bynta ka Thaiñ Shatei Lam Mihngi.
