Ka jingher wiaw wiaw jong ki kali ki heh ki haiñ, kum ki paidbah ngi sngewthuh ba ki beh sha ki jingïalang ne ki kam kiba kyrkieh. Ngi sngewthuh ba kum ki heh ki haiñ ki long shisha kiba bunkam bha bad ka por ruh na ka bynta jong ki, ka long kaba kordor, ha kaba tang ha ka shisngi ruh ki don ki prokram ne ki jingïalang kaba ki hap ban beh, la ka dei na kawei ka shnong sha kawei pat, ne na kawei ka district sha kawei ka district bad ruh na kawei ka jylla sha kawei pat. Ym kum ki por jong ki phew tylli ki snem kiba la leit noh, ba ka leit ka wan ka dang kylluid bad kam da don jingeh than ban beh ïa ki kam, hynrei ha kine ki por kiba mynta, la sakhi ba ka jingbun jong ki kali ha ki surok syngkien ka la buh jingeh shi katdei ban ïoh ïaid wut wut bad kumta khlem pynpah ïa ki siren ne ‘wiaw wiaw’ kan long shisha kaba eh ïa ki heh ki haiñ kum u Myntri Rangbah, ki Myntri bad kiwei kiwei ban poi sha ki jaka ne ki jingïalang kaba ki thmu ban leit.
Hynrei kumba ka paw hi, kane ka jingpynher ïa ki kali khamtam da ka kali jong ki pulit kaba ïaid nakhmat ban pyllait lynti ïa ki kali jong ki heh ki haiñ, ka la buh jingma shi katdei pat ïa ki kali jong ki riew paidbah kiba ïaid ha lynti namar ki la shu ïaid pynher khlem pyrkhat shuh ïa kiwei ki kali ym tang ha ki surok kiba beit hynrei la lap ba wat ha ki jaka ba long khongwaiñ ruh. Ngi ïohi ba ka jingpynher ïa ki kali ba pyndait bad pynpah sairen ka la pynwit shi katdei ïa ki nongleit nongwan ym tip shuh hato kine kiba her ha ki kali, ki dei shisha kiba kyrkieh kam ne kiba kyrkieh leit sha la ki ïing ki sem. Kum kane ka ‘VIP Culture’ la dei ban pynsangeh noh, lada ym lah ban burom lem ïa ki kali jong ki riew paidbah ha ki surok syngkien.
La ju sakhi ba tang shu wan kine ki kali pynpah siren, la hap ban kynriah beit watla ym don ka jaka kaba biang ruh, I kumba lada long hap ban noh ruh wat sha ki nala ki thliew tang ban pyllait lynti ïa ki. Kaba kham buh jingma lei ka dei ha ki surok ba long khongwain, ha kaba la shu pynher beit khlem pyrkhat ïa ki kali kiba wan na ka liang pyrshah. Ha ka jingshisha ha ki jaka ba long khongwain ne kham khapngiah ki dei ban pynsuki bad ïa burom lem ïa ki kali jong ki riew paidbah.
Ka nongbah Shillong ka dei kaba mad bha ïa ka jingkhapngiah na ka jingbun jong ki kali bad ka jingneh kumjuh jong ki surok hynrei ngim ïohi satia ïa kino kino ki lad ki lynti ba ka Sorkar kan shim ne wanrah ïa ki kyndon ba thymmai bad kane ka paw ba imat na ka liang jong ki heh ki haiñ kim sngewthuh satia ïa kane ka jingeh namar kim mad lem kumba mad ki riew paidbah kiba shong da ki kynta kynta ha ki surok manla ka sngi katba ki heh ki haiñ pat wut wut ki ïoh ban her ki kali ban leit sha ki jaka ba ki thmu. Hato u paidbah um don mo ka hok ban ïoh lem ka lad ban suk ha ka leit ka wan bad sa katno un dang ïai mad ïa kum kine ki jingeh.
