Shillong, Risaw 26
Ka Don Bosco Youth Center (DBYC), Shillong, kawei na ki shlem ba ai jinghikai ha ki kam bapher-bapher na ka bynta ki samla khnang ba kin lah ban ïeng ha la ki jong ki kjat, bad ban ïoh jingmyntoi ruh ha ka jingim jong ki, ha ka Sngi Balang, na ka liang u Director, Fr. Michel Makri u la ai da ka kor suh jaiñ ïa ka samla Sinora Khongshei kaba la pyndep ïa ka jingshah hikai jong ka ha ka jingsuh jaiñ.
Kane ka jaka ai jinghikai ka ju kyrshan bad ai sngewbha na ka por sha ka por khamtam ïa ki samla kiba ‘pass’ bha kiba la pyndep ïa ki jingshah hikai bapher-bapher da ki komputor, ki ‘Laptop’, ki kor suhjaiñ bad kiwei-kiwei khnang ba kin lah ban ïeng ha la ki jong ki kjat bad ba kin lah ban seng ïa la ki kam ki jam.
Haba kren ha katei ka prokram, u Director u la ïathuh ba katkum ka jingbishar jong ka nonghikai kaba ai jinghikai, la ibit ïa kane ka samla ba kan ïoh ïa kane ka kor suh jaiñ kum ka dak ban ai mynsiem ïa ka bad ïa kiwei pat ki khynnah samla khnang ba ki lah ban ïeng ha la ki jong ki kjat.
Ka samla Sinora Khongshei na ka liang jong ka, ka la ai khublei ïa ka DBYC bad ïa ka nonghikai, bad ka la kyntu ïa ki para ba pule lang ban trei shitom bad ban minot ha ka kam.
