Shillong, Risaw 26
Ka Meghalaya SSA Schools Association (MSSASA) ka la mudui da ka ‘Review Petition’ sha ha ka Ïingbishar ba ha khliehduh ka ri, ban kyrpad khmih bniah ïa ka rai (jong ka) ha ka 1 tarik u Nailur, 2025, kaba la pynlong kongsan ïa ka Teacher Eligibility Test (TET) na ka bynta baroh ki nonghikai kiba dang don ha ka kam, khlem da kheiñ ïa ka jingslem jong ka jingshakri jong ki.
U President ka MSSASA, Bah Aristotle C. Rymbai u la pynbna ba ïa ka ‘Review Petition’ la mudui ha ka 24 tarik u Risaw bad pynpaw ïa ka jingsngewnguh sha baroh ki nonghikai SSA na bynta ka jingkyrshan bad ka jingduwai jong ki.
“Ngi don hangne ban pyntip sha baroh, khamtam ki nonghikai SSA lem bad kiwei-kiwei ki kyrdan nonghikai ha ka Jylla ba ka MSSASA ha ka 24 tarik Risaw ka la mudui da ka ‘Review Petition’ ha ka Supreme Court ka ri India,” la ong u Bah Rymbai ha ka Sngi Saitjaiñ.
Kane ka rai jong ka Supreme Court ka long katkum ka jingpynbna ka National Council for Teacher Education (NCTE) jong u snem 2010 bad ki jingpynkylla ha u snem 2017 haba ïadei bad ka aiñ Right to Education (RTE).
U la pynkynmaw ba kham mynshuwa ka tnad Pule-Puthi ka la pyllait ïa ki nonghikai kiba la thung hashuwa ka 23 tarik u Nailar, 2010, na ka eksamin TET (MTET) jong ka Jylla.
Hynrei ka rai kaba dang shen ka la pyndam noh ïa kata ka jingpyllait, kaba la pynlong kongsan pat ïa baroh ki nonghikai kiba don ha ka kam ban hap pyndep ïa ka TET.
Ka MSSASA ka la kynthoh ba ka jingpyntreikam ïa ka rai da kaba phai biang sha ki snem bha la dep kan ktah ïa ki nonghikai kiba la shakri slem ha ka kam bad kiba la jan shongthait.
U Bah Rymbai u la pynpaw ba ka seng kan sa pyntip sha ki nonghikai haba ïadei bad kino-kino ki jingmih bathymmai halor kane ka mukotduma ha ki sngi ban wan.
Katkum ka jingkheiñ ka tnad Pule-Puthi jong ka Jylla, ki don kumba 43,102 ngut ki nonghikai ha kylleng ka Jylla.
Katba ïa ka jingdon ba tikna jong ki nonghikai ki bym pat pyndep ïa ka TET ym shym la batai bniah, u Myntri ka tnad Pule-Puthi, u Bah Lahkmen Rymbui dang shen u la kdew ba ka rai jong ka Supreme Court ka lah ban ktah ïa kumba 10,000 – 15,000 ngut ki nonghikai ha Meghalaya.
