Shillong, Risaw 26
Ki pulit ka nongbah Shillong kila kem noh ïa uwei u rangbah ba la 42 snem ka rta ha ka sngi Saitjaiñ namar ka jingkynnoh ba u kren kynshleiñ ïa ki kynthei ha ki jaka paidbah ha ki thaiñ Laitumkhrah, Shillong.
Kane ka jingjia, ka dei kaba jia naduh u bnai Jymmang 2025, une u rangbah uba la tip kyrteng kum u Tamdorlang Risaw ba ñiah ïa ka kali Bolero, la kynnoh ba u kren kynshleiñ ïa ki kynthei ha katei ka thaiñ.
Ki pulit kila ïoh pdiang ïa artylli ki ejahar ha ka 15 tarik Risaw 2025, bad kila pynlong ïa ka jingtohkit ban lapdien bad kem ïa une u briew.
U Tamdorlang Risaw u dei uba shong ba sah ha Nongrah Block-II, u la shah kem ha Tawang, Mawsynram bad la kurup ruh ïa ka Bolero kaba don ïa u registration number ML05-P-7884 ba u pyndonkam, ong u Superintendent of Police.
Ïa une u briew yn sa rah tiañ bishar sha ka ïingbishar katkum ki kyndon jong ka aiñ.
