Haba pule ïa ka Khubor “Ka ktien Hindi ka dei ka National Language, ong u Bah Powell” (U Nongsaiñ Hima 23 Risaw (October) 2025) ka paw shai ba U Bah Powell Sohkhlet EM, Khasi Hills Autonomous District Council u kren khlem tip. Ka Hindi kam dei ka ktien ïa ki muluk lane ïa u paidbah jong ka Ri India (National Language). Ha ka jingshisha ïa ka Hindi la kdew (designate) ïa ka kum ka ktien jong ka Sorkar India(Official language) katkum ka Artikle 343 jong ka Riti Synshar ha India. Ryngkat bad ka Hindi ka ktien phareng ruh lah ban pyndonkam ha ki office jong ka Sorkar India. ïa ka ktien Hindi ym pat rai da ka aiñ ba ka dei ka ktien ïa ka muluk lane ïa u paidbah jong ka Ri India (National Lauguage). Ban ong ba ka ktien Hindi ka dei ïa ka muluk lane ïa u paidbah ka Ri India(National lauguage) ka dei ka jingpyrkhat bakla (misconception) kaba lah ban ïalam bakla ïa u paidbah ba pule ïa kane ka khubor.
V. K. Lyngdoh
Riat Laban, Shillong
