Khliehriat, Risaw 25
Ka Sutnga SSCC bad ka Diengshynrum SC ki la khur jingjop ha ka Super Division Football Tournament na ka bynta ka 5th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba la long ha madan artificial turf Diengshynrum, Khliehriat ha ka sngi Saitjaiñ, ka Sutnga SSCC ka la pynliem noh ïa ka Shilliang Umshong SC da 4-0 kol. Ïa kine la thep da u Ker Syrti tang ha ka minit 6, kumjuh u Rihokme Tyngkan (10), Sauni Phawa (58) bad u Jeffrey Surong (90+1).
Haba phai sha kawei pat ka jingïalehkai, ka Diengshynrum ka la jop da 3-1 kol ïa ka Ladrymbai B SC. Ka Diengshynrum ka la lah ban ïalehkai bha naduh kaba sdang ha kaba ka la ïoh ban thep haduh lai kol ha ka kylla step lyngba u Leki Dkhar ha ka minit 4, katba u Rumi Lyngdoh u la thep ar kol ha ka minit 18 & 36. Hynrei ka Ladrymbai ka la lah ban pynphai kylla shi kol hashwa ban wai lyngba u Mihsalan Suïam ha ka minit kaba 87.
