Shillong, Risaw 25
Ka ‘thei ïalehkai ka Jylla ka Alphonsa Zinia Wriang ka la wanrah burom ïa ka ri India hi baroh kawei da kaba ka la long tang marwei ban khur takma ha ka jingïalehkai Muaythai ha ka 3rd Asian Youth Games Olympic 2025 kaba la long ha Bahrain.
Watla ka United Mauythai Association-India kaba la lah ban sei haduh 10 ngut ki nongïalehkai sha katei ka lympung kaba la sdang naduh 22 haduh 28 tarik mynta u bnai, pynban khyndai ngut ki la shah rem noh bad ka Alphonsa ka la ïeng skhem ban ïada burom ïa ka ri India na ka bynta ban long tang marwei ban khur jingjop da kaba ka la ïohpdiang ïa ka takma rnong ha ka kyrdan ïalehkai jong ka Waikru bad ban ïoh 8.27 point.
Kat kum ka jingïathuh da u President ka Muay Thai Association of Meghalaya (MTAM) u Bah Angelus Sun, u la ong ba kane ka dei ka sien kaba nyngkong eh ba ka Muaythai ka la ïoh ïa ka lad ban rung ha kane ka thup ïalehkai jong ka Asian Youth Games Olympic.
“Ngi sngewkmen eh ba katei ka khynnah ïalehkai jong ngi ka la wan ban wanrah nam bad burom ïa ka ri hi baroh kawei bad ka la long tang marwei napdeng ki shiphew ngut ki nongïalehkai kynthei bad shynrang kiba la leit shim bynta ha katei ka lympung ha ki kyrdan ïalehkai jong ka Combats, Waikru bad ka Mai Muay. Ki la don saw ngut ki shynrang bad hynriew ngut ki khynthei.”
Na ka liang ka Muay Thai Association of Meghalaya ka la ai khublei bad paw ka jingsarong halor ka jinglah ban khur takma ha katei ka lympung bad kane ka pyni ba ki khynnah ïalehkai ka Jylla ki long kiba lah ban pynpaw pyrthei ïa la ki sap ïalehkai lada ki long kiba kut jingmut bad trei shitom met bad mynsiem.
Te kumta ka Alphonsa kan wanphai sha la ïing ha ka 29 tarik bad yn pdiang burim da ki nongïalam katei ka synjuk na kad liengsuiñ ha Guwahati ha ka por 3:30 nohphai sngi.
