Jowai, Risaw 26
Lada la don ki riewpyrman jong ka Guinness Book of World Record ne ka Limca Book of Record ba ïohi ïa ka jingbun briew ba ot kba ha Shnong Lapangap kin jin da ai ïa ka World Record ne Limca Record na bynta ka jingbun paid ban ot kba.
Ka Shnong Lapangap hapoh ka West Jaiñtia Hills District ka la ïoh lad biang ban ot kba naduh ka 22 tarik Risaw, hadien ka jingïakren pynbeit bad ïa soi soskular ïa ka jingïakynad bad ki nongshong shnong Tahpat jong ka West Karbi Anglong District.
Ka jingïakynad hapdeng ki nongshong shnong Lapangap bad ki nongshong shnong Tahpat ka la mih hadien ka jingthung dieng da ki Tahpat ha jaka ba la kam markylliang da ki Lapangap bad ki Tahpat.
Ki Lapangap ki la jynrat ïa ki tynrai dieng ha u bnai Jylliew 2025 bad naduh nangta ki Lapangap kim ïoh lad ban rep ban riang namar ki Tahpat ki pynthut ïa ki.
Ha ka sngi kaba saw jong ka jingot kba kata ha ka 25 tarik Risaw kaba dei ruh ka sngi Saitjaiñ, ki la don kumba 2000 ngut eiei ki briew kiba kynthup ïa ki nongshong shnong Lapangap, ki nongshong shnong na kiwei kiwei ki shnong marjan, ki dkhot jong ka NPP-Youth Wing, ki dkhot jong ka Hills Farmers Union bad kiwei de ki la mih paidbah ban ot kba sha ki pynthor ba don ha Lapangap bad katto katne tylli ki pynthor jong ki nongshong shnong Lapangap ba don ha Nongjrong.
Haba ïakren bad u Waheh Shnong Ma Deimonmi Lyngdoh u la pyntip ba u kba ban ot, sah sa ha ki bynta kiba hapdeng ka Pynthor Lapangap.
U la ong ba ha kane ka sngi la lah ban ot kba ha ka jaka kaba heh kumba 45 hecter kiba kynthup ki hali ba don ha Nongjrong bad ha Pynthor Lapangap.
