Shillong, Risaw 26
Kiba haïing hasem haduh mynta kim pat ïoh pdiang ïa ka kaiphod na ki doktor NEIGRIHMS Hospital haba la ïaid haduh khadphra sngi naduh ba la lap ïa ka metïap jong u heprit Kyrshanbor Kharmudai, 7 snem ka rta.
Lada kheiñ naduh ka sngi ba la lap ïa ka metïap jong u heprit Kyrshanbor kaba dei ka 9 tarik Risaw 2025 haduh mynta ka sngi ka 26 tarik Risaw 2025 ka la long khadphra sngi hynrei haduh mynta kiba haïing kim pat ïoh pdiang ïa ka kaiphod post mortem.
Katkum ka rukom ba la leh, ïa ka kaiphot post mortem ki doktor ki ju aiti beit ha u Superintendent of Police ka East Khasi Hills District hadien kata kin sa pyntip sha kiba haïing hasem bad pyntip lang sha ki lad pathai khubor khnang ba ki paidbah kin ïoh jingtip hynrei haduh mynta kiba haïing bad ki paidbah ki dang sah ha umdum namar kim pat ïoh pdiang ïa ka kaiphod.
Ym tang katta, lada kheiñ naduh ba u jah na la ïing ha ka 8 tarik Risaw, 2025 ka la long khadkhyndai sngi hynrei ki pulit kim pat ïoh kem ïa kiba donkti kiba rahbor ïa utei u khynnah.
Kum ban shu pynkynmaw u heprit Kyrshanbor u dei u khunswet uba la jah na ïingsah ha ka por ïalehkai ha phyllaw ïing ha ka 8 tarik mynta u bnai por 4:00 baje janmiet hynrei haba ki nongshong shnong ki la wad baroh shimiet kim lap bad ha ka sngi ba bud ka 9 tarik la ïoh jingtip ba la lap ïa ka metïap u heprit kyrshanbor la lap harud surok ha Mawpat.
Ka jingjah u Kyrshanbor na ïingsah ka la pynsuba ïa kiba haïing ba lah ban dei ba pynïap menshohnoh namar haduh mynta ki pulit kim pat lapksai.
Ka jingbym lap ksai ki pulit ïa kiba pynïap ïa u heprit Kyrshanbor ka la pynartatien shuh shuh ïa kiba haïing bad ïa ka imlang ka sahlang.
