Shillong, Risaw 25
Ka Pine Mount School bad ka St Edmund’s ki la khur ïa ka nam lahduh ha ka 1st Interschool Swimming Championship 2025 ba la pynïaid da ka True North Fitness Centre and Swim-ming Academy, kaba la poi sha kaba kut ha ka sngi Saitjaiñ ha Lapalang.
Ha kane ka jingïakop jngi kaba la ar sngi lynter, la wan shim bynta ki nongjngi kynthei bad shynrang na ki skul bapher bapher jong ka nongbah ha kaba la sakhi lang da ki khynnah skul, ki nonghikai lem bad ki kmie ki kpa jong ki khynnah.
La ïadon lang ha katei ka sngi kaba khatduh da ka editor jong ka Shillong Times bad kaba la ïohpdiang ruh ïa ka khusnam Padma Shri Kong Patricia Mukhim, katba u Bah Brian Kharpran Daly kum u symbud kongsan.
Ka St Edmund’s bad ka Pine Mount ki dei kiba bun tam ki nongshim bynta napdeng ki 155 ngut ki nongjngi na ki 25 tylli ki skul.
Te kumta ka St Edmund’s ka la khur haduh 29 tylli ki takma(10 ki takma ksiar, 10 ki rupa bad 9 ki rnong), kata ka Pine Mount ka la ïoh 19 tylli ki takma (6 ki takma ksiar, 6 ki rupa bad 7 ki rnong).
Lah ban kdew ba ki ar ngut ki nongjngi kata u Shaun M Diengdoh na ka Assam Rifles Public School bad ka Nazareen Parïong na ka KJP Girls’ High School. Kine baroh ar ngut ki la long tang marwei ban mihkhmat na kine ki jaka pule ha kaba ki la wan ha ka kyrdan balai napdeng ki shynrang bad ba-ar ha ka liang ki kynthei jong ki kyrdan ïakop jong ki.
Kine baroh ar ngut ki dei kiba la shah jinghikai ha ka True North. U Shaun, uba dei u khun jong ka Kong Shelly Diengdoh, u la lah ban pynpaw ïa ka jingtbit ha ka 15-17 boys’ da kaba khur 5 tylli ki takma ksiar, kata ka Nazareen, kaba dei ka khun jong ka Kong Landaris Parïong, ka la khur ïa ki 6 tylli ki takma ksiar bad kawei ka rupa ha ka 15-17 girls’ division.
Uwei pat u nongjo p u dei na ka skul Seven Set, ha kaba u Meïaipynsan Lyngdoh Tron u la khur 7 tylli ki takma ksiar. Ki paralok jong u na katei ka skulk i la khur ïa ka takma rupa bad rnong na ka bynta ban kynjoh sha ki 13 tylli ha ka liang ki shynrang bad ban pynlong ïa katei ka skul ban wan ba-ar hadien ka St Edmund’s.
Watla ka jingïalehkai jngi ka dei kaba pynbyrngia bha, hynrei kaba la khanglad ïa ka jingkiew ha kane ka Jylla ka dei namar ka jingkhriat. Pynban kitei ki ar jylli ki pung jngi jong ka True North, ha Lapalang bad Mission Compound ki dei kiba ju ai jinghikai jngi ïa ki khynnah baroh shisnem na ka bynta ban sei ïa ki nongjngi kiba kynsai bad ki ban nangkiew shaphrang.
