Shillong, Risaw 25
Ka Nongkseh SC bad ka Meghalaya Police F.T ki la bteng biang ban khur ïa ki jongjop da mar 4-0 kol ha ka lympung ïalehkai First Division 2025 ba la pynïaid da ka Shillong Sports Association ha ka sngi Saitjaiñ ha SSA Stadium kaba ha First Ground, Polo.
Ha kane ka jingïakhun ka MLP ka la pynliem noh ïa ka Pohkseh bad hadien ka Nongkseh ka la jop ïa ka Mawtawar.
U Baïaikupar Swer u la khur ïa ka hat-trick na ka bynta ka Nongkseh ha kaba u la thep ha ka minit kaba 61, 72 & 79 bad ïa kawei pat la thep tang mar ïasdang da u Shano Tariang (7).
Ha kawei pat ka liang, ka MLP ka la ïohei shi kol na ka daw ka jingbakla u rangïalehkai ka Pohkseh u Banïar Pyngrope ha ka minit kaba 7. Kane ka shi kol ka la pynïoh mynsiem ïa ka MLP ha kaba ka la thep biang shi kol ha ka kylla step lyngba u Balmingstar Lyngkhoi (24) bad sa ar kol ha ka kylla miet lyngba u Chesterfield Nongdhar (70) bad u Pynshaidor Nongrang (76).
Te kumta ka Nongkseh bad ka MLP ki la kamai mar 15 point na ki san sien ïakhun, hynrei ka Nongkseh ka la ïoh ban lamkhmat da kaba ka la tam lyngba ka jingïapher ha ka jingthep kol (+29 la +16).
Ha ka lah sngi U Blei ka jingïalehkai kan long hapdeng ka Mawkhar pyrshah ïa ka Lawsohtun ha ka por 1:15 mynsngi.
