Shillong, Risaw 26
Ha ka jingpynkut ïa ka jingrakhe dap 75 snem ka Shillong Vidyalaya Secondary School u Lat ka Jylla u C.H. Vijyayashankar u la ïoh ban pyllait paidbah ïa ka ‘Jubilee Souvenir’ ka skul.
Ka Shillong Vidyalaya Secondary School ka dei ka skul kaba la seng ha u snem 1950 bad kaba la ai jingshakri 75 tylli ki snem ban ai jingnang jingstad ïa ki khun samla bad kaba la kyntiew ïa ka pule puthi jong ka Jylla Meghalaya.
Ha katei ka jingpynkut ïa ka jingrakhe u Lat ka Jylla Meghalaya u C. H. Vijayashankar, u la long kum u kongsan katba u Bah Sanbor Shullai MLA ka South Shillong Konstitwensi uba long Myntri Sorkar u la long kum u symbud kongsan.
La pyni phuh pynphieng ïa ka prokram da ki jingrwai ba sngewtynnad na ki samla pule, la pynkup burom ïa kiba shah khot sngewbha, ki ‘headmaster’ barim, ki samla pule barim (alumni), ki samla pule ba la wanrah burom ïa ka skul, ïa ka kynhun ba wan ba ar ha ka Subroto Cup 2025, ki nonghikai bad ki nongtrei kiba la ai jingshakri ïa ka skul.
U Lat ka Jylla u C.H. Vijyayashankar, haba ai jingkren u la ai khublei ïa ka skul ha ka jingïaid lynti ba ka la ïaid la 75 tylli ki snem bad u lah ïaroh ruh ïa ka jingtrei bad ka jinglah ka skul ban ai jingshakri bad jinghikai ïa kiba bun pateng ki nongshong shnong.
U la pynshlur ïa ki samla pule ban pdiang ïa ka jinglong ryntih, ka jinglong ba janai bad ka jingsngewrit kumba ki mynbarim kiba la ïalam ha ka ban wad ïa ki jinglong babha.
U Bah Sanbor Shullai, haba ai jingkren u la ai ka jingïaroh ïa ka jingnoh synñiang jong ka skul ban ai ka jingnang jingstad bad u lah kyntu ïa ki khynnah pule ban nang kyntiew ïa kane ka skul ha kane ka pateng ba mynta.
Uwei u na ki samla pule barim (alumni) jong ka skul u la pynkynmaw ïa ka pateng bad jinglong jong ka skul. Hadien nangta la pyni sha ki nongwan shim bynta ha kane ka prokram da ka jingrwai ba sngewtynnad ba la rwai da ka ARC Jazz band na Assam Regimental Centre, Happy Valley, kaba la ïoh ka jingïaroh na ki paidbah.
