Shillong, Risaw 26
Ki spah ron (century) ba la lah ban kamai da u Arpit Bhatewara bad u Kishan Lyngdoh, ka la pynlong ïa ka kynhun ïalehkai ka Meghalaya ba kan seng ïa ka nongrim kaba khlain ha ka jingïakhun pyrshah ïa ka Sikkim ha ka Ranji Trophy 2025-26 plate group, kaba la long ha madan ïalehkai kriket ka MCA, Polo.
Haduh ba kut jong ka sngi kaba ar, ka Meghalaya kaba la shimti ïa ka pali ban tied bad kamai 271 ron hadien ba ka la hap noh 2 wiket, ha kaba u Arpit u la lah ban kamai 132 ron bad u Kishan Lyngdoh u la ïoh 102 run, bad pynlong ïa ka Meghalaya ba kan duna sa kumba 75 ron ba kan tam na ka 346 ron ba la lah kamai da ka Sikkim.
U Arpit bad u Kishan ki la lah ban kynjoh sha ki 212 ron ha ka jingïatied lang, kaba la jia hadien ba ka Meghalaya ka la lap ba hap noh ar wiket hadien ba ka la lah ba kan kamai 59 ron, kaba wan hadien ba Bonchang Sangma (16) bad Ajay Duhan (4) ki la shah pynkhyllem noh ha u Kranthi Kumar (1/62) bad u Palzor Tamang (1/44).
Pynban hadien ka jingwan mih u Arpit bad Kishan, kine baroh arngut ki la lah ban ïalehkai bha bad ban kamai ym duna ïa ka saw run na man ka over bad ban pynneh ïa ki wiket jong ki bad ban bteng pat ha ka sngi kaba bud. Te kumta kine ki ar ngut ki la lah ban bynrap lang da 17 tylli ki ‘six’ lyngba u Arpit bad 12 tylli na u Kishan.
Haba wan ban bteng ïa la ka pali ha ka sngi kaba ar, ka Sikkim ka la lah ban bet tad haduh 19 over hadien ba ka la lah ban kamai 346 ron, bad ki wiket kiba la hap ha kane ka step ki long u Kranthi na ka bynta 95 ron bud pat sa u Palzor na bynta 17 ron bad ia kine ki wiket la khur da u Dippu Sangma (3/72) bad u Akash Chaudhary, (5/85).
Kumta sa lai sngi kaba sah jong kane ka jingïakhun, ki khmat mynta kin phai sha u Arpit bad u Kishan ba haduh katno kin lah ban btin lynti ïa la ka kynhun sha ka thong jong ka jingjop.
Haba ïadei bad ka jinglah ban ïalehkai bha kitei ki ar ngut, u President ka MCA u Naba Bhatacharjee, u pynpaw ïa ka jingkmen ba u Kishan u la lah ban wanphai biang sha ka jingim ban ïalehkai bha, hadien ba um shim la lah ban paw bha ha ka samoi ïalehkai ba la dep.
