Nongpoh, Risaw 26
Tang ar sngi hadien ba ki bor pulit ka Ri Bhoi hapoh ka jingïalam jong u Senior Superintendent of Police, u Vivekanand Singh Rathore lem bad u Additional Superintendent of Police, Bah Orville Massar ki la khynra ïa ki trok, ka surokbah National Highway 6 na Byrnihat ter ter shaduh sha Jorabat la ïohi ba kala sdang ban kylluid war na ki trok kiba ju pynïeng beaiñ ha katei ka jaka.
Ïa kane ka jingsdang kylluid jong ka surokbah, ki pulit Ri Bhoi kila pyntip paidbah ruh lyngba ki rynsan social media ha ka sngi U Blei, ha kaba ki la buh ruh ryngkat bad ki dur ki dar ban pyn-i sha ki paidbah ba ka jingtalasi ha kine ki sngi kiba la dep, kala sdang ban seisoh, ha kaba ym shym la ïohi shuh ïa ki trok kiba ju mlien ban pynïeng beaiñ ha kitei ki bynta jong ka surokbah.
Na ka liang ki bor pulit ka Ri Bhoi kila buh ruh ka jingkyntu sha ki paidbah ba kin ai ïa ka jingïatreilang ryngkat bad ka tnat pulit da kaba kin shondur ne ring durkhih lada lap ïa kino kino ki kali kiba pynïeng beaiñ ha ki bynta jong ka surok bad ban phah pat sha u number +91-6909300160 jong ka Ri Bhoi Police Control Room bad ïa ka kyrteng jong ki nongpyntip ruh, yn buhrieh.
