Jowai, Risaw 26
U Bah Phresmi Suting bad 36 ngut ki nongshong shnong jong ka Mynsngat kila ujor ejahar pyrshah ïa ka tnat Public Health Engineering Department (PHE) RWS Division, Jowai, ïa ki Chairman bad Secretary ka Village Water and Sanitation Committee (VWSC) Mynsngat halor ka jingkynnoh bamsap kaba long pyrshah ïa ka aiñ bad ka hok paidbah ha ka skhim Swachh Bharat Mission (SBM).
Katkum ka ‘work order’ kaba la pyllait ha ka 19 tarik Naiwieng, 2024, kane ka skhim ka dei na ka bynta ban shan painkhna kaba tip kum ka Individual Household Latrine (IHHL). La mang ban shna painkhana na ka bynta ki 164 ha ka dor kaba 12,000 tyngka kawei ka longïing. Baroh ka pisa kala kot T.19,68,000- bad ka pisa kaba la pyllait kala kot 60 percent na ka District Swaach Bharat Mission (Gramin), kata 11 lak 80 hajar 800 tyngka.
Katkum ka ejahar ba la ujor ha u ophisar in-charge ka thanad Nartiang ha ka 25 tarik Risaw, u Bah Phermi Suting u la ong ba katkum ka RTI ba la ïoh na ophis PHE RWS Division Jowai la pynpaw ba ki don haduh 164 tylli ki longïing kiba dei hok ban ïoh myntoi na ka skhim Swachh Bharat Mission.
Hynrei katkum ka jinglap ka jong u, u la kynnoh ba bun napdeng kine ki nongïoh bynta kim shym la ïoh wat tang ka pisa lane ka jingpyntrei kumba la mang da katei ka tnat.
Shuh shuh u la ong ba ïa ka kam bamsap ki nongïoh myntoi kim tip eiei tad haduh ba u la ïoh ïa ki jubab jong ka RTI.
Ka skhim Swachh Bharat Mission ka dei ka thong jong ka Sorkar ban pynbiang painkhana ha man ki thliew ïing ba duk ban rat dyngkhong ïa ka jingleit painkhana pathar, hynrei mynta kane ka skhim kala kylla long tang ka lad ban bamsap ïa ka hok ki paidbah, la kynnoh u Bah Phermi Suting.
Kumta u la dawa na ki bor ka aiñ ban kem bad pynshitom katkum ka aiñ ïa baroh kiba donkti ha kane ka kam kaba ktah ïa ka hok jong u paidbah bad u duk u suk.
