Florida, Risaw:
Katei ka briew kaba la ithuh kyrteng kum ka Sakiyna Thompson, kaba la don 31 snem ka rta, la ong ba ka la shah pynngat kyndon halor ka jingkynnoh ba ka la pyniap ia ka Kayla Hodgson, 23 snem ka rta, hapoh Tamarac jong ka nongbah Florida, ha u Naitung jong u snem 2022. Katkum ka jingshem jong ki pulit, ki suba ba baroh ka dei tang namar ka jingbishni bad jingsngew bitar jongka ia katei ka samla namar ba ka ia ïaid bad u samla barim jongka.
Kumta, la ong ba katkum ka jingbishar jong ka ïingbishar ha ka Sngi Ba-ar, la shem ba ka Thompson ka la pyniap ia katei ka samla ba thymmai jong u samla barim jongka, tang namar ba katei ka samla 23 snem, ka la ‘block’ ia ka na ka rynsan ‘Social Media’ bad ba kam shym la ioh lad shuh ban kren ne ong eiei ia ka.
Ha ka por jong katei ka jingjia, la ong ba ka Thompson ka la don 2 bnai ba ka pun ia i khun na utei u briew uba ka ia ïaid hashwa. Kumta, ka la pynksan ba kam shym tip briew eiei shuh ha ka por ba ka leh ia katei ka kam pyniap briew, hynrei ynda ka la kyndit na ka jingiapler, ka sngewthuh shai ba ka la dep pyniap hi da lade ia katei kawei pat ka samla jong u briew jongka.
Ka Thompson ka la phla hakhmat ka ïingbishar, ba ha katei ka sngi, ynda ka la kyndit bynriew, ka la ieng na katei ka madan ba ka thiah, da ka snam suda bad ka la hap ban ïaid nalor jong ka snam kaba la tuid ha madan bad kaba la tuid na katei ka samla, kaba ka la dep tied pyniap. Hynrei, ka Thompson ka la ong ba ka jingpyniap jongka ia katei kawei pat ka samla ruh ka long tang ban ïada ialade bad kam shym la thmu ban pyniap syndon ia ka.
Ka iathuh ruh ba ka hap ban ïakhun bad kum pyniap ia ka, namar katei ka samla ka la shim da kawei ka iit bad ka pduh na ki bynta jong ka kpoh jongka hapdeng ka jingarmet jongka. Kumta, ka sngew ba katei ka samla ka pyrshang ban shim ia ka jingim jong i khun ba ka pun bad kumta ka lap ka jingbitar bad ka pyni da ka bor haduh ba kan da kum pynmynsaw ia katei ka samla tad haduh ba kan da duh noh syndon ia la ka jong ka jingim.
Hadien kata, ka Thompson, la ong ba ka la phong noh ia lade na ki jingriam jong ka Hodgson bad ka la ialeh ban pynkhuid ia katei ka jaka, khlem da ieh shuh khyndiat ruh i sakhi- sabut. Hynrei ki pulit ki la ioh kem noh ia ka ha u Nailar jong u snem 2022 bad la aiti ia ka sha ki bor ka aiñ jong ka nongbah Florida, ha kaba, mynta ka la shah rai ban shah pynshong patok baroh shi jingim.
