Shillong, Risaw 26
Ka kynhun ki khynnah ïalehkai ka Jylla ka la sdang da ka jingjop ha ka Sub Junior Boys’ National Football Championship 2025-26 (Tier-2), hadien ba ka la lah ban pynliem noh ïa ka Chhattisgarh da 6-1 kol ha ka sngi U Blei ha Narainpur, Chhattisgarh.
U Ïaishanborlang Khongjee bad u Marbiang Marweiñ ki la thep mar ar kol, katba ïa kiwei pat la pynbud da u Wanpyndap bor Nongsiej bad u Macstar Nongkynrih na ka bynta ban pynlong ïa ka Meghalaya ban khur ïa ki lai point ha ka Group-C.
Haba phai sha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang khamtam ka Chhattisgarh haba ka ïoh ban ïalehkai ha la ïing. Hynrei hadien shiteng kynta ka Meghalaya hapoh ka jingïalam u Bah Dapmon Tariang (coach) ka la ïoh ban pynkhih jar haduh lai kol lyngba u Macstar (33) bad ïa ki ar kol la thep da u Marbiang (34 & 34).
Hashwa ban kut ka jingïalehkai jong ka kylla step ka Meghalaya ka la thep biang sa shi kol lyngba u Wanpyndapbor (45+2) na ka bynta ban tam da 4-0 kol.
Hadien katto katne por ba la bteng biang ïa ka jingïakhun jong ka kylla miet, ka Meghalaya ka la thep kol biang ha ka minit kaba 69 lyngba u Ïaishanborlang. Ban lait na ka jingshah brut, ka Chhattis-garh ka la ïoh ban pynphai kylla shi kol lyngba u Fuldhar (72) hashwa ba u Ïaishanborlang (78) un thep biang sa shi kol na ka bynta ban pynlong ïa ka Meghalaya ban khur syndon ïa ka jingjop.
Te kumta ka Meghalaya kan pynkhreh ïa ka jingïa-khun kaba ar pyrshah ïa ka Andhra Pradesh ha ka sngi Ba-ar ha por 8:30 mynstep bad ïa ka Himachal Pradesh ha ka 30 tarik.
