Islamabad, Risaw:
Ka Pakistan International Airlines (PIA) kaba la pynïaid da ka sorkar, ha ka sngi Saitjain, ka la sdang biang ïa ka jingpynïaid liengsuiñ jong ka sha UK, hadien ba ka la shah pynsangeh haduh san snem, hadien ka jingpynjari halor ka jingkynnoh ïa ki laisen niah liengsuin thok.
Ka “liengsuiñ kaba nyngkong eh na Islamabad sha Manchester naduh u bnai Naitung 2020 ka la mih ryngkat bad 284 ngut ki nongleit nongwan” ha ka liengsuiñ ha ka jingdon ryngkat u Myntri kam pohïing ka ri u Khawaja Muhammad Asif, ong ka PIA ha ka kyrwoh.
Ka European Union Aviation Safety Agency (EASA) bad ka UK Civil Aviation Authority ki la khang ïa ki liengsuiñ jong ka PIA ha u snem 2020 hadien ka jingjia tyngkhuh bad hap ka liengsuiñ kaba ha Karachi ba pynlong ïa kumba 100 ngut ki nongleit nongwan ban ïap bad hadien kata la pynpaw da u myntri liengsuiñ ha kata ka por u Ghulam Sarwar Khan ba ka jingbun ki nongniah liengsuiñ na Pakistan ki bat ïa ki laisen thok.
Katba ka EASA ka la weng ïa kane ka jingpynjari ha u bnai Naiwieng jong u snem ba la dep, ka UK ka la weng noh ïa ka Pakistan na ka Air Safety List ha u Naitung mynta u snem, kaba la ailad ïa ki kompeni liengsuiñ jong ka Pakistan ban applai ban pynïaid ïa ki liengsuiñ ha Britain.
La pynlong ia ka jinglehkmen ha Islamabad International Airport shwa ba katei ka liengsuin kan mih, ha kaba la iashim bynta da ki heh ophisar na ka tnad iada ri, ki tnat sorkar, bad ka tnat liengsuin.
Haba kren ha kane ka sngi, u myntri kam pohïing u Asif u la ong ba ka jingsdang biang ia ki liengsuin beit-beit kan pynkhlain shuh shuh ia ka jingiadei hapdeng ka Pakistan bad ka UK. U la ong ba kane ka jingshakri kan ai ki lad leit jingleit kiba kham bha bad kham suk sha ki palat 1.6 million ngut ki nong Pakistan kiba sah ha Britain.
U myntri kam pohing u la bthah ia ki heh jong ka PIA ban pynbha ia ka por leit liengsuin jong ka kompeni bad ki jingdonkam hapoh liengsuin bad ban shim ia ki sienjam ban pyniar ia ki lynti. Ha kane ka sngi la donlang ruh ka British High Commissioner sha Pakistan ka Jane Marriott ban leit ai khublei ia ki nongleit nongwan.
Ka PIA, ka iathuh ba ha kaba sdang, kan pyniaid ar tylli ki liengsuin, shi taiew, hapdeng ka Islamabad bad Manchester, ha ka sngi Palei bad sngi Saitjain, ha kaba ka don ka jingthmu ban pyniar suki-suki ia ki liengsuin sha London bad Birmingham.
Ka jingweng noh ïa ka jingkhang kaba san snem ha u bnai Naitung ka la jia ha ka por ba ka Islamabad ka la pynsted ïa ki jingpyrshang ban pynlong ka jingtrei shimet ïa kane ka kompeni liengsuiñ kaba la duhnong.
Ka PIA ka la antad ïa ka jingduhnong ha ka khajna ha shisnem kumba PKR 40 billion (USD 144 million) ha ka por jong ka jingkhang kaba san snem, namar ba ki lynti ka UK kum ka Manchester bad Birmingham ki long napdeng kiba kamai tam jong ka bad ki kynthup ruh ïa ki jaka hiar liengsuiñ ha ka kad liengsuiñ Heathrow ha London.
