Nongstoiñ, Risaw 27
Ha ka sngi Nyngkong jong ka taïew ki nongkitkam bapher-bapher jong ka Congress na West Khasi Hills ha ka jingïalam jong u Bah Bormanding Nonglang, President ka District Congress Committee ki la iehnoh ïa ka Congress bad leit ban pynïasoh noh sha ka sem jong ka NPP.
Ïa kine ki nongkitkam jong ka Congress na WKH kiba la leit ban rung sha ka NPP la ïoh ban pdiang burom da u President ka NPP Meghalaya Unit u Bah Prestone Tynsong, uba long ruh u Symbud Myntri Rangbah ka Jylla ha ka jingïalang kaba la pynlong ha phyllaw ka IB PWD Upper New Nongstoiñ.
Ha kane ka jingïalang pdiang burom ïa ki nongkitkam ka Congress, la donlang ruh u Bah Gigur Myrthong, Working President ka NPP WKH, u Bah Gabriel Wahlang MLA ka Nongstoiñ ha kajuh ka por kum u Secretary State Unit, u MDC ka Rambrai Bah Lurshai Kharbani lem bad kiwei-kiwei. U Bah Bormanding haba kren ha ka jingïalang u la ong, ka jingrung ka jong ki sha ka NPP ka long da ka lynti trei kam ym ba ki shu rung khlem da don la ka jong ka lynti trei kam, bad naduh ba ki ïa pynbeit ban rung kila ïoh ban ïakynduh ïa ki nongïalam naduh ki State haduh ki Block kumta ter-ter bad ki la leh da ka lynti trei kam ha shuwa ban sa rung sha ka NPP.
U Bah Prestone Tynsong u la pynpaw ïa ka jingkmen ban pdiang sngewbha ïa ki nongkitkam ka Congress kiba la wan ban rung sha ka NPP da kaba u la ong ruh ba “Kum u President ngi pdiang sngewbha sha ka ïing ka sem jong ka NPP hapoh ka jingïalam jong u Conrad K Sangma, uba dei u National President bad ha kajuh ka por u Myntri Rangbah ka Jylla”.
Shuh shuh u la kyntu ruh ïa baroh ki nongïalam bad ki nongkitkam ka seng jong ka West Khasi Hills ba kin ïa trei shitom shuh-shuh ba yn ïoh ïa ka jingjop ba don burom ha u snem 2028.
“Ki don bun ki jingkren kiba lai phew jait kiba lai phew skit hynrei ngim dei ban duh mynsiem namar ha ki rynsan social media ngi ju ïohi ka jingïapah ka jingïakynnoh ka bym ithuh ithaw shuh, hynrei nga kwah ban ong tang kawei kynmaw bha wat peit than bad wat sngap than ïa ki jingkren ha ki rynsan social media namar 90 percent ki dei ki khubor thok, ki khubor lamler ki bym don jingshisha hangno-hangno ruh,” ong u Bah Prestone.
U Bah Prestone u la ong ruh ba ka NPP ka ïeng ban shakri ïa ka Jylla baroh kawei, ban shakri kyrpang ïa ka West Khasi Hills baroh kawei bad lyngba jong kane ka seng la ïohi ïa ki matti kiba trei kam ha ki sector bapher-bapher bad ba yn sa nang ïohi shuh-shuh ïa ki kam nangne shakhmat kaba yn sa nang pyntyllun ha kawei pa kawei ka shnong bad ki konstitwensi kiba hap ha West Khasi Hills.
U Bah Prestone u la ong ruh ba ka surok Nongstoiñ sha Maweit kala dei kawei na ki matti kaba khraw. “Ban ïatip lang, nga kwah ban ïathuh na Maweit ngi la rai ban shna ka surok ban pynmih sha Nongjri bad balei ngi kwah ban leh kumta namar kane kan dei ka jaka kaba long pdeng ha ka khaïi ka pateng ka ban ïasoh bad ka Ranikor, sha Bangladesh bad sha South Garo Hills baroh kawei bad kane kan ym duna ïa ka 3 spah klur ba yn pynlut bad kane kan long ka jingmyntoi ïa ka West Khasi Hills baroh kawei,” u la ong. Shuh shuh u la ong ruh ban ïakren ïa ka jingshisha ym pat don Sorkar naduh u 2018 kaba lah ban pynlut por pynlut ha ka lynti ka syngkien, dei tad ha u 2018 haduh kane ka khyllip mat kaba mynta ba ka jingpynlut pisa ha kaba ïadei bad ka surok ym duna shuh ïa ka 15 hajar klur tyngka.
“Ngam don por ban jer kyrteng ïa ki sector kiba bun bah kaba ngi la leh bad kaba ngin dang leh hynrei nga ngeit skhem kumba nga ong ïa phi ki paidbah ka Jylla Meghalaya jong ngi kin sa ïohi ïa kine kiei-kiei baroh namar lehnoh ei ba ngin ïa pyrta ha surok tang ka shyntur suda bad lehnoh ei ruh ban ong ieit ïa ka jaidbynriew lada ngim lah ban leh ei ei ïa ka,” ong u Bah Prestone da kaba bynrap ruh “Namar ban kren ïa ka kyntien jingieit kala poh dor bha kaba suk bha ban ong ieit hynrei nga ong ïa phi ba ai ba ka kam jong ka NPP kan kren kham jam ban ïa kita kiba shu pynpaw da ka jynhaw hakhmat jong ngi ki paidbah ka Jylla baroh kawei.”
