Shillong, Risaw 27
Ka Sorkar Jylla ka la rai ban mudui da ka ‘Review Petition’ ha ka Supreme Court, pyrshah ïa ka hukum (jong ka), kaba la pynmih ha ka 1 tarik Nailur, 2025, kaba pynlong kongsan ïa ka Teacher Eligibility Test (TET) na bynta baroh ki nonghikai kiba dang don ha ka kam, khlem da kheiñ ïa ka jingslem ha ka jingshakri jong ki.
U Myntri ka tnad pule-puthi, u Bah Lahkmen Rymbui u la pynpaw ba ka jingsngew jong ka Sorkar ka long ba katei ka hukum ka don ïa ka jingktah haba phai dien sha ki snem ba la leit bad ba ki kwah ba ka Supreme Court kan pyllait noh ïa ki nonghikai kiba shah thung kam hashuwa ba ka aiñ Right to Education (RTE) kan treikam.
“Ka jingsngew jong ngi ka long ba kane ka hukum jong ka Supreme Court ka don ka jingktah haba phaidien bad kaei kaba ngi kwah ka long ba hadien jong ka aiñ RTE ba ka Sorkar ka dei ban pyllait ïa baroh kito ki nonghikai kiba la shah thung kam hashuwa ban wan ka aiñ RTE”, u la ong ha ki nongthoh khubor ha ka Lah Sngi U Blei.
“Hadien ka jingwan jong ka RTE, ha ka jingpynbna kaba hadien jong ka NCTE kaba dei ka bor pynïaid na bynta ka jingpule ‘Elementary’ bad ‘Primary’, ki la buh ïa ka kyrdan na ka bynta ki nonghikai kaba ngim don jingkylli eiei ruh em”, la pynshai u Bah Rymbui.
U Bah Rymbui u la ong ba palat 32 hajar ngut ki nonghikai kin shah ktah ha kane ka hukum, kaba mut ba ki hap ban pyndep ïa ka TET hapoh ar snem.
U la pynpaw ïa ki jingsngewkhia ba ym baroh kine ki nonghikai ki lah ban pyndep ïa ka TET hapoh ka por ba la buh. U Myntri u la pynshai ruh ba ki nonghikai kiba la pyndep ïa ka Meghalaya Teacher Eligibility Test (MTET) ne ka Central Teacher Eligibility Test (CTET) kin lait ban ïakhun ha kiwei pat ki eksamin TET bad ka kam jong ki ka long kaba skhem. Ha kaba ïadei bad ka jingai jingmut jong ka State Education Commission ban pynduh noh ïa ki nonghikai kiba duna ha ka jingpyntbit, u Bah Rymbui u la ong kane ka long ka jingkylli halor kumno la batai ïa ka – namarba ka Sorkar ka la thung nonghikai katkum ki kyndon ba la buh da ka National Council for Teacher Education (NCTE).
“Kaba mut ba baroh ki dei ki nonghikai kiba la pyntbit,” u la bynrap.
U la ban jur ba ka hukum jong ka Supreme Court ka la bthah ba ki nonghikai kiba dang don ha ka kam ki hap ban pyndep ïa ka TET hapoh ar snem, hynrei lada ka ïingbishar kan pynkylla ïa ka hukum jong ka, kan long ka jinglong-jingman kaba pher bak-ly-bak.
“Hadien ba la ong ba shisien ba ki la biang pura haba ïadei bad kita ki kyndon baroh, kata ka mut ba ki la biang,” la bynrap shuh-shuh u Myntri.
