Shillong, Risaw 27
Ki nonghikai hapoh ka shatri jong ka All Primary School Teacher Association (APSTA) ha ka 27 tarik Risaw 2025, ki la leit ban ïakynduh ïa u Commissioner and Secretary ka tnad pule-puthi ka Sorkar Jylla, u Vijay Kumar Mantri ban pynsngew halor kiba bun ki mat ban ïathir khamtam ïa ki mat kiba la pynmih hukum da ka Supreme Court ïa ki nonghikai.
Haba kren sha ki lad pathai khubor u Bah F.C.Shullai, General Secretary ka kynhun u la ong ba ki mat kiba ki nonghikai ki la ïoh ban ïa kren bad ïathir ki dei halor ka jingpynmih hukum ka Supreme Court, ba baroh ki nonghikai kidei ban pyndep ïa ka Teachers Eligibility Test (TET).
Nalor kata, ka jingbym pynlong examin shuh ïa ki khynnah naduh Pre-school haduh class-2, ka ‘Arrear’ na ka bynta ki nonghikai, ka jingthep ïa ka CPF hapoh bank da kaba ong ba haduh mynta ki nonghikai kim pat ïoh ïa ka bank account jong ki.
Ki nonghikai ki la ïa kren ruh halor ka Meghalaya Education Grant (MEG), ka jingshah thung ki nonghikai kum ki Booth Level Officer (BLO) bad kiwei-kiwei de.
Ka kynhun ka la buh ka jingdawa na ka Sorkar ba ïa ki nonghikai kiba la pass ïa ka SET kim donkam shuh ban ïaleh ïa ka TET. Kumta na ka liang u Commissioner and Secretary u la kular ban phah leh noh sa ïa ka DEERT, kaba mut ka District Eligibility Test.
Nalor kitei ki mat, ka All Meghalaya Primary School Teachers Association (AMPSTA) ka la ïoh ruh ban ïakren ban ïathir bha halor ka jingbym lah ban thung nonghikai ha ki Lower Primary School.
Haba ïadei bad kane u Bah F.C.Shullai u la ong ba ki don haduh 256 tylli ki kam nonghikai Lower Primary (LP) kiba lait hynrei ym lah ban thung kam namar ka jingdon ka Roster System kaba la pyntreikam ha ka thung kam thungjam.
“Ka kynhun ka la ai jingmut sha ka Sorkar ba 80% ki Khasi-Jaiñtia dei ban thung kam hikai ha ki jaka ba dei Ri Lum Khasi-Jaiñtia bad 80% ki Garo ha Ri Lum Garo,” la ong u Bah F.C.Shullai.
U la ong ba naduh ba la pyntreikam ïa ka Roster System ki don palat 256 tylli ki post nonghikai ki bym lah satia ban thep, bad halor kane na ka liang ka kynhun kan sa leit ban ïa kynduh ïa ki Sub-Divisional School Education Officer ban ïa kren katkum ka jingpynbna paidbah ba la pynmih da ka tnad pule-puthi halor ka jingthungkam ha ka kyrdan Lower Primary.
U Bah Shullai u la ïathuh ruh ba halor kine ki mat jingïakren, na ka liang u Commissioner and Secretary un sa phah sha ka Deputy Commissioner.
