Nongpoh, Risaw 27
Ka Khasi Students Union (KSU) North Khasi Hills District ha ka sngi Nyngkong kala pynlong ïa ka jingjurip ïa ka surokbah National High-way 6 ha ryngkat ki bor pynïaid District ka Ri Bhoi, ki bor ba dei khmih ka National Highway Authority of India (NHAI), ki nongïalam jong ki shnong ka sor Nongpoh lem bad kiwei-kiwei de, na ka bynta ban pynurlong ïa ki mat jingdawa kiba la sahkut mynta da ki bun-bun snem.
Kane ka jingleit jurip kaba la pynlong ha kane ka sngi hapoh ka jingïalam jong u Presi-dent, u samla Ferdynald Kharkamni, ka dei ruh hadien ba na ka liang jong ka KSU ha kine ki khyndiat taïew kiba la dep, kala leit ban ai dorkhas biang sha u Deputy Commissioner ka Ri Bhoi ban pynkynmaw ïa u bad ruh ïa ka NHAI lyngba ka Minis-try of Road Transport and Highways halor ki jingeh kiba bun kiba ki paidbah ka thaiñ ki ïakynduh, kiba kum ka seng ka la mih ban dawa naduh u snem 2016, hynrei ki shu kut noh tang ha ki jingjurip bad jingkular khlem poi shano-shano.
Ha kane jingjurip kaba la pynlong ha kane ka sngi, na ka liang jong ka ophis u Deputy Commissioner ka Ri Bhoi, la wan ban mihkhmat da u Akash R Marak, Assistant Commissioner ha ka jingdon ryngkat lang jong u Consultant ka NHAI, u Krishna Gutty, u President ka KSU NKHD u samla Ferdynald Kharkamni, ki nongïalam shnong ka sor Nongpoh lem bad kiwei-kiwei de.
Lyngba kane ka jingjurip, ka seng ka la pynkynmaw biang ïa ki mat jingdawa kiba kynthup naduh ka jingtei ïa ki lynti ïaid kjat na suiñ (foot-overbridge) ha Nongpoh, Byrnihat, Umling, Umsning Patarim bad ha Mawlein Mawkhan, ka jingtah rong lieh ha ki jaka jam na shilliang sha shilliang surok (Zebra crossing) ryngkat ki rumble strips ha kiba bun ki bynta jong ka sor Nongpoh, ka jingmaramot mardor ïa ka jingjot jong ka surokbah, ka jingpyndait signboard bad ki kor ring durkhih ban lap ïa ki kali kiba pynher sted palat bad ruh ban pynbha ïa ki nala um bad pynkylla kum ki lynti ïaid kjat ryngkat ki jingker de na ka bynta ka jingshngaiñ jong ki paidbah nongleit nongwan, nalor kiwei-kiwei.
Kum ban shu kdew hangne, na ka liang jong ka NHAI kala pyntip ba kala mang tyngka ban pyndait ïa ki streetlights ha ki 5 kilometre ki bynta jong ka sor Nongpoh ba kynthup naduh na Umlyngkdait haduh ha Umjarasi Nongthymmai, hynrei na ka liang ka KSU ka buh ruh ka jingkyrpad ba lada kitei ki streetlights kim long kiba shai bha, dei ban buh ruh sa ki floodlights kiba khlaiñ kum ha Downgate, ha lad jong ka Bethany Hospital Outreach, Pahamsyiem bad ha lad Iewmawlong, naba kine ki jaka ki dei kiba ki paidbah ki ju pyndonkam bha.
Hadien jong katei ka jingjurip, na ka liang ka NHAI ka kular ba kan pyndep bad phah ïa ka kaiphod ka jong ka sha u Deputy Commissioner ka Ri Bhoi hashwa jong ka 31 tarik mynta u bnai Risaw 2025 bad hadien kata kin sa shim pat ïa ki sienjam ban pyntreikam ïa kitei ki mat jingdawa jong ka seng bad ki nongïalam shnong. Katei ka jingkular jong ka NHAI, kala ai mynsiem ïa ki nongïalam ka KSU bad nongïalam shnong, khamtam kumba kitei ki jingdawa ki dei kiba ki paidbah, ki khynnah skul bad nongleit nongwan ki ju kynduh jingeh na ka por sha ka por.
Na ka liang u President ka KSU NKHD, u samla Ferdynald Kharkamni haba kren sha ki lad pathai khubor, u la ong ba wat lada ka seng ka ai jingïaroh ïa kane ka sienjam kaba la shim da ka NHAI ha kane ka kynti, hynrei ka dei ban pynthikna ruh ba ka kam ruh dei ban ïohi noh ha kine ki khyndiat por, naba kum ka seng kam lah ban pdiang shuh ïa ki jingpynsyrwa kai ïa ka por kumba la dep ban jia ha ki jingjurip bad ki jingkular kiba la pynlong ha ki por kiba la dep.
“Ngi sngewtynnad ïa ka jingai jingkular, hynrei ki paidbah kim dei shuh ban dang ap khlem pud. Lada ngim ïohi ïa ka kam ha kine ki khyndiat por, ka seng kam banse ban shim ïa ka sienjam kaba tyngeh, la ka dei ban khang wat ïa ka khyrdop khrong khajna jong ka NHAI ha 20 Mer Pahammawlein ruh,” la ong u samla Ferdynald Kharkamni da kaba bynrap ba kam don jingmut satia ïa ka NHAI ba kan dang khrong khajna lada kam lah pat ban pynthikna ïa ki jingdonkam, ki lad jingïada bad jingshngaiñ jong ki paidbah nongleit nongwan.
Utei u nongïalam ka KSU, u la ong ruh ba kane ka kam dei shuh ban shu kut tang ha ki kot sada, hynrei kala dei ïa ka NHAI ba kan pyni noh da ka kam, naba kine ki mat jingdawa, ki dei ki bynta jong ka hok bad jingshngaiñ jong ki paidbah ka thaiñ Ri Bhoi bad ym dei shuh ban dang pynslem nangne shakhmat.
