Shillong, Risaw 27
Ka jingsniew jong ki surok ha kiba bun ki jaka ha sor Shillong khamtam ha ki bynta jong ka surok ba jur bha ka jingdheng kali kum ha Motphran ter-ter shaduh sha Stand Jeep ka la wanrah shuh-shuh ym tang ïa ka dheng kali hynrei wat ka jingeh ha ka leit ka wan jong ki briew bad khynnah skul ba ïaid lyngba kane ka surok.
La ïoh ban sakhi ba ka jingsniew ka surok ha kine ki bynta ka la long shisha kaba jubor bha bad kam dei ka jing-sniew kaba dang thymmai hynrei kaba la neh da ki snem bad lada dei ba ym pyndap lei da ki maw ne ka khyndew, la ishitom bad isangsot ïa ki nongñiah kali kiba ïaid lyngba kane ka surok.
Nalor ka jingsniew jong ka surok ha ki bynta jong ka Stand Jeep, la ïohi ba ka la don ruh ka jingsniew jong ka surok ha ki bynta jong ka Motphran bad ruh ha ki bynta ban poi sha Bimola, hynrei kaba sngew sangsot ka long ba ym i don satia ki nongpeit nongkhmih watla kane ka jingsniew mynta ka la don da ki bnai.
Haba peit ïa ki kali kamai ne ki kali ki riew shimet bad kumjuh ruh ïa ki paidbah kiba leit ba wan da ka kjat, la i sangsot shisha, namar ka la wanrah bad buh jingeh shi katdei eh khamtam lei ha kine ki khyndiat taïew ba dang jur u slap.
Ki nongñiah kali bad ki paidbah ki la buh jingkylli balei ka tnat PWD ka sngap jar bad leh matlah halor kane?
Ki paidbah ki la kyntu ïa ka Sorkar ba kan bthah noh mardor ban maramot noh ïa ka bynta jong kane ka surok kaba kylla thliew wat hadien ba la dep pyndap mawria kham mynshwa.
La ïohi ruh ba ki don ki bynta ka surok kiba la kham heh ka thliew bad buh jingma ym tang ïa kiba ïaid lynti hynrei ïa ki kali ruh kumjuh.
Nalor ba ka thaiñ Motphran ka dei lypa ka jaka kaba khapngiah na ka jingbun ki kali bad ki nongleit nongwan, ka jingsniew bad pei thliew jong ki bynta ka surok, ka la nang pynsyrtok shuh shuh, kaba la pynsuki lut ïa ki kam ki jam.
Haba phai sha ka surok ha ki bynta jong ka Stand Jeep sha Garikhana, ka la dei ka surok kaba la da ki snem ba ka Sorkar kam pat maramot haduh mynta bad ki nongkamai kali bad paidbah ba leit ba wan ki hap ban ïakynduh jingeh khamtam ki khynnah skul bad kiba ïaid kjat.
Ka jingkylli kaba mih mynta ka long hato kiba don ha ka bor bad kiba dei khmih ïa kane ka bynta, kim ïohi ne ki leh matlah ïa kane ka jingjot rathai jong ka surok ne kiei kiwei pat ki daw jong ka jingbym lah ban pynïaid shakhmat ïa ka kam maramot ban pynsuk ïa ka leit ka wan.
Ka Sorkar ka la pynbna ba ka nongbah Shillong ruh ka dei kawei na ki nongbah kaba la ïoh ïa ka nam ‘Smart City’ hynrei hato kane ka nam ka dei tang ha ka kyrteng namar haba peit ïa ka jinglong jingman jong ki surok pat ym pat ikop satia.
