China, Risaw:
Katkum ki khubor, la ïathuh ba ki nongleit nongwan jong ka liengsuiñ kaba nyngkong eh kaba iaid beit-beit na India sha China, kaba la treikam biang mynta ha ka sien nyngkong eh hadien 5 snem ba la sangeh pyntreikam ïa ka, la ong ba kitei ki nongleit ki la hiar ha China ha ka Sngi Nyngkong da katei ka liengsuiñ, hadien ba ki heh jong ka Asia, ki la weng noh ïa ka jingpynsangeh ïa ka jingleit-jingwan jong ki liengsuiñ, katba ki dang husiar bha ban tei pat ïa ka jingïadei. Ka liengsuiñ IndiGo 6E1703 na Kolkata ka la hiar ha ka nongbah Guangzhou kaba don sha ka phang Shathie jong ka China ha ka por 4:00 baje mynstep, da kaba bteng biang ïa ka jingïatreilang jong ki tnat liengsuiñ jong ka India bad China kiba la shah pynsangeh naduh u snem 2020 namar ka jingwan jong ka khlam Covid bad ki jingeh ha ka saiñ hima sima.
Ki ri marjan bad ki ar tylli ki ri kiba bun briew tam ha ka pyrthei ki dang long ki nongïalehkai ba thmu kiba ïakhun ban ïoh ïa ka jingsynshar ha ka thaiñ, hynrei ki jingïadei ki la nang kham jem suki suki naduh ka jingïakynad ha khappud Himalaya kaba la pynïap briew ha u snem 2020.
Ka sorkar India ka la ong ba ka jingsdang pyntreikam biang ïa ki liengsuiñ kan kyntiew ïa ka jingïadei hapdeng ki nong India bad ki nong China bad kan ïarap ruh ban pynbit- pynbiang ïa ki jingïakynduh hapdeng ki arliang mamla. Ki nongleit nongwan kiba shong ha ka liengsuiñ kaba nyngkong — napdeng jong ki bun ki nong India kiba wad ïa ki lad kamai shabar ri — ki la ïathuh ha ka AFP ha kad liengsuiñ Guangzhou shaphang ka jingsuk jong ka jingpynïasoh ba la sdang biang.
Ka jingïadei kaba kham sngur bad ka China ka wan jia ruh ha kum kane ka por ba ka jingïadei jong ka India bad ka United States, ka paralok ba kongsan eh jong ka India ha ka khaïi- pateng, ka la hiar bad sniew bun bha, hadien ka hukum jong u President jong ka US Donald Trump ban pynjari da kaba pynshitom ïa ka khajna kaba 50%.
Ki nongïarap jong u Trump, ki la kynnoh ba ka India, ka la pynshlur bad ai jingkyrshan ïa ka jingleit hiar thma jong ka Russia pyrshah ïa ka Ukraine, da kaba thied ïa ka umphniang jongka ban pynim ïa ka ioh- ka kot jong ka.
